Otamotz

Goierriko Hitza Goiberri

Albisteak

Arkaitz Jauregi Elorriagaren errekorra hausten saiatuko da

Arkaitz Jauregi Elorriagaren errekorra hausten saiatuko da
apirila 04
19:37 2018

Astelehenean Pazko Bigarreneko Jaia ospatu zuten Antion. Urteroko moduan, haurrentzako jolasak, txokolatada, herri kirolak eta erromeria egon ziren. Protagonista nagusia Arkaitz Jauregi aizkolaria izan zen: Jabier Aranberri Elorriagak 1995ean egindako lana egin zuen. Herri kirol elkartekoek Elorriagaren marka haustea proposatu zioten, baina ez zuen gustuko egurrik aurkitu eta azkenean erakustaldia egin zuen. Gustuko egurra aurkitzen duenean, errekorra hausten saiatuko dela esan du.

1995eko apirilaren 17an Aranberrik kanako egurra ebaki zuen eta ondoren Izazpira joan-etorria egin zuen. Enborra mozteko 16 minutu eta zazpi segundo behar izan zuen, Izazpira igotzeko 26 minutu eta 32 segundo eta Izazpitik jaisteko 13 minutu eta 59 segundo. Guztira, 56 minutu eta 38 segundo behar izan zuen.

Jauregik bere burua errekorra hausteko gai ikusten zuen, baina ez zuen gustuko enborrik aurkitu. Izan ere, negua gogorra izan da eta basagizonek apenas eduki dute lan egiteko aukerarik.

Hala, erakustaldia egitea erabaki zuen. Elorriagak duela 23 urte baino denbora gehiago behar izan zuen, baina korrikan Zumarragako aizkolariak baino denbora gutxiago eman zuen.

Hala, gustuko enbor bat aurkitu bezain laister, errekorra hausten saiatuko dela aurreratu du. Izan ere, proba prestatzeko egindako lana aprobetxatu nahi du: azken asteetan sarritan etorri da Zumarragara eta Izazpiko igoera primeran ezagutzen du dagoeneko. «Egurrarekin ez dut batere zorterik eduki. Zumarragara eraman nuena ere espero baino okerragoa zen. Barrutik oso zikina zen. Aizkorarekin lan ona egin nuen, baina denbora asko behar izan nuen egurra txarra zelako. Lan luzea egin behar izan nuen arren, korrikan berak baino denbora hobea egin nuen».

Hori dela eta, errekorra hausteko gai dela uste du. «Egurra bilatzen jarraituko dut, marka hausteko. Aizkolari batzuk egur ona aurkitzen badute, abisatuko didatela esan didate. Dena kontra edukita lan ona egin nuenez, egur onarekin marka hausteko gai izango naizela uste dut. Lehenbailehen saiatuko naiz».

Jauregi Arabako Ilarduia herrian bizi da, baina Beasainen jaio zen. 33 urte ditu eta artzaina da. Mutikotan pilotan jokatzen zuen, baina 21-22 urterekin aizkora hartzea erabaki zuen: Etxarri Aranatzeko aizkolari eskolan izena eman zuen.

Txapelketetan ez duela oraindik bere maila eman dio. Hala ere, Arabako txapelketa hiru aldiz irabazi du eta Zilarrezko Aizkora binakako txapelketa bi aldiz. Urrezko Aizkora txapelketan lau aldiz parte hartu du.

Egileari buruz

Otamotz

Otamotz

Harremana duten artikuluak

0 iruzkin

Oraindik erantzunik gabe!

Momentuz ez dago erantzunik, zurea gehitu nahi al duzu?

Idatzi iruzkin bat

Idatzi iruzkin bat

Zure e-posta helbidea ez da argitaratuko.
Derrigorrezko eremuak markatuta daude *

3 + 6 =


Kilometroak

Kilometroak

Iruzkin berriak

Aitor: Garbitzaile danak emakumezkoak eta batzordeko danak gizonezkoak. Ba hoixe. [...]

Jonmikel: Ez dakit zein irizpiderekin izendatu den horrela, baina bihar Antio ermitan egingo den 'Antiguan orain' [...]

sebas: zumarragarrek eta ez zumarragatarrek [...]

Zumarratarra: Barkatu, baina oin horiek sokako dantzarienak dira. Kapitainek oinetako beltzak daramatzate. [...]