Otamotz

Goierriko Hitza Goiberri

Albisteak

«Gorputzak uzten didan bitartean, jaurtiketak egingo ditut»

«Gorputzak uzten didan bitartean, jaurtiketak egingo ditut»
martxoa 02
09:59 2017

Ainhoa Toledok (Zumarraga, 2000) hiru domina lortu ditu Euskadiko txapelketan: urrezkoa mailu jaurtiketan eta zilar eta brontzezkoa diskoarekin. Azken hau, maila absolutuan.

Zein kirol egin zenituen atletismoan hasi aurretik?

Futbola asko gustatzen zitzaidan eta 10 bat urterekin Urolan jokatu zuen. Baina 12 urterekin lagun batek atletismoan izena eman zuen eta atzetik joan nintzen. Leire Irizar du izena eta abiadura probetan parte hartzen du. Berari eskerrak eman beharrean nago!

Hasieratik jaurtiketa probetan aritu al zinen?

Ez. Modalitate ia guztiak probatu nituen: krosa, altuera jauzia, abiadura probak, luzera jauzia… Jaurtiketetan, pisujaurtiketarekin hasi nintzen. Ondoren, xabalina jaurtiketa egin nuen eta, gero, diskoa. Duela bi urte mailuarekin hasi nintzen. Luzera jauziak gustura egiten nituen, baina jaurtiketak gusturago oraindik.

Diskoa eta mailua dira zure jaurtiketa tresna kuttunak.

Diskoarekin eta mailuarekin gusturago sentitzen naiz bolarekin baino. Emozioak oso ezberdinak dira. Bola 9-10 metrora bidaltzen nuen. Diskoa eta mailua askoz ere urrutirago bidaltzen ditut. Hori dela eta, sentsazioak askoz ere biziagoak dira eta motibazioa handiagoa.

Motibatuta zaudela nabarmena da. Orain arte emaitza bikainak lortu dituzu.

Orain dela bi urte, mailua probatu eta berehala, Euskadiko txapelketa irabazi nuen eta Espainiako txapelketan parte hartu nuen. 12. postua lortu nuen. Mailuan hasieratik emaitza onak lortu nituen eta horrek asko motibatu ninduen. Euskadiko txapelketetan zortzi domina lortu ditut. Espainiako txapelketara ez naiz itzuli. Ea aurten lortzen dudan.

Orain arte lortutako emaitzekin gustura egongo zara.

Beno… Markak hobetu nahi ditut. Euskadiko errekorrak nahiko urruti ditut. Atleta onak egon dira. Mailuari dagokionez, Dorleta Oiarbide adibidez. Denboraldi batean berarekin entrenatu nuen. Aurtengo nire helburu nagusia lehiaketaren batean Espainiako txapelketan parte hartzeko behar den gutxienekoa lortzea da. Ez da erraza izango, baina gogo bizia dut eta horrek zailtasunak gainditzen laguntzen du. 48 bat metroko jaurtiketa egin beharra dut.

Diskoarekin eta mailuarekin jarraitzeko asmoa al duzu?

Bai. Izan ere, biak gustatzen zaizkit. Askok biak uztartzea ezinezkoa dela diote, baina oraingoz emaitza onak lortzen ari naiz eta ez dut bietako bat baztertu nahi. Oraindik ez dakit bietako zein den gehien komeni zaidana. Ez dago jakiterik non bukatuko dudan.

Diozun bezala, oso zaila da biak uztartzea.

Gainera, Argixaon jaurtitzaileok ez ditugu entrenatzeko baldintza egokiak. Anexoan kaiola bat behar dugu. Haurrak daude-nean ez naiz mailua edo diskoa botatzera ausartzen. Beti ez duzu ondo botatzen asmatzen eta mailua eta diskoa ez dira jostailuak. Oso arriskutsuak dira.

Nola entrenatzen duzu orduan?

Zelai nagusiko harmaila txikiaren goialdera botatzen ditut diskoa eta mailua. Baldintza horietan ezin dut luzera entrenatu, baina bai altuera. Askotan, mailua eta diskoa goran gelditzen dira eta bila joan beharra dut. Gainera, behean ez dut zirkulurik eta zirkulu gabe entrenatzea kaltegarria da. Zein distantziara botatzeko gai naizen jakiteko eta jaurtiketak zirkulutik egiteko, 16:30a aldera etorri behar naiz entrenatzera: haurrak etorri aurretik. Udalak sare bat jartzeko asmoa du. Ea egia den.

Nor da zure entrenatzailea?

Javi Gomez. Oso gustura nago berarekin. Asko lagundu nau eta berari esker lortu dut lortu dudan guztia. Hemen ez dugu proba bakoitzeko entrenatzaile bat eta berak diseinatzen dizkigu urte osoko entrenamenduak. Gainera, bera da zein proba komeni zaigun esaten diguna. Sekulako lana egiten du. Aitari ere eskerrak eman nahi dizkiot, lehiaketa guztietara eramaten bainau.

Telebistan atletismo probak ikusten al dituzu?

Bai. Asko gustatzen zait atletismoa ikustea. Gainera, ikusiz asko ikasten da. Jaurtiketetan aditua den entrenatzailerik ez dudanez, bideoak ikusiz ikasten dut. Lehiaketen aurretik, urduri banago, jaurtiketa bideoak ikusten ditut. Horrek asko lasaitzen nau.

Benetako afizioa duzu.

Hala da. Gorputzak uzten didan bitartean, jaurtiketak egingo ditut. Asko gustatzen zait eta horrek gero eta gehiago entrenatzeko indarra ematen dit. Behartuta ari bazara, entrenamenduak oso pisutsuak egiten dira. Atletismoa nire bizitzako zati bat da jada. Astean lautan entrenatzen dut, zortzi bat ordu guztira.

Argixaon ez dira jaurtitzaile asko egongo…

Hiru bakarrik gaude eta ni naiz mailua eta diskoa jaurtitzen dituen bakarra. Gainera, neska bakarra naiz. Aitari eta lagunei mailua jaurti behar nuela esan nienean, benetako mailu bat jaurti behar nuela uste zuten. Orain, denek dakite zer den mailu bat. Hori lortu dut behintzat.

Egileari buruz

Otamotz

Otamotz

Harremana duten artikuluak

0 iruzkin

Oraindik erantzunik gabe!

Momentuz ez dago erantzunik, zurea gehitu nahi al duzu?

Idatzi iruzkin bat

Idatzi iruzkin bat

Zure e-posta helbidea ez da argitaratuko.
Derrigorrezko eremuak markatuta daude *

1 + 7 =


Iruzkin berriak

Luis Bengoetxea: Gora Luis!!!!!!!!! [...]

Pako: Lotsagarria greba eguna aprobetsatuz, propaganda politikoa egitea..U30 greba orokorra [...]

lizarriturri: Benetan, nik ya ez dakit zeintzuk dian Goierriko Hitzan kriteriok. Atzo hamaika ibilgailuk elkar jo [...]

Igor: Ama aipatzen hasita, bigarren abizena agertzea ez legoke gaizki. [...]