Asteazkenean Diabetesaren Nazioarteko Eguna izango da eta horren ildoan, Urgadielek glukosa neurtzeko mahaiak jarriko ditu gaur goizean Zumarraga, Urretxu eta Legazpin, ohiko lekuetan. Aginaga auzoan ere, bertako festak izanik, froga egiteko aukera izango da. Horretarako behatzean ziztada txiki bat besterik ez da egin behar eta doan da. Mahaietan elkartearen loteria izango dute salgai.
Froga egin eta gero indizeetan normaltasunetik at dagoen zerbait ikusiz gero, elkartekoek medikura joateko gomendioa emango dute. Urgadieleko kideen arabera, «gero eta jende gehiago dago diabetesa izan baina ezjakintasunean bizi dena, batez ere haurren kasuan gertatzen den zerbait da, eta hori erraz ekidin daiteke».
Azaroko hitzaldiak
Bestalde, asteazkenean bertan, Ama Zelulen inguruko hitzaldia emango du Cesar Trigueros zientzialariak, Zelai Ariztin aretoan, 19:00etan. Trigueros Donostian dagoen Inbiomed fundazioko ikerlaria eta Inbiobankeko zuzendaria da eta bai diabetesa zein beste hainbat gaixotasunen inguruan interesgarria den Ama Zeluzen inguruko gaia jarriko du mahai gainean, izan ere, urte asko daramatza gaia ikertzen. Hitzaldi hau interesa duen edonorentzat irekia izango da.
Bestalde, Urgadiel elkarteko kideek azaroaren 28an, Legazpin elikaduraren inguruko hitzaldi eta saio praktikoa izango dute Mertxe Matxinbarrenaren eskutik. Elkarteko kideek urtean zehar honelako saioak izaten dituzte, Legazpi, Urretxu edo Zumarragan, elikadurak garrantzi handia duelako baina elkarteko kide ez direnenek ere parte hartu dezakete
