Ostadar mendi taldeak Mendiko eta Naturako Argazkien Lehiaketaren laugarren aldia deitu du. Uda garai honetan oporretan aukera berezia dago argazkiak ateratzeko. Aurtengo berritasuna da lehiaketa argazki digital formatura pasatu dutela.
Bost sari
Sariak ere eguneratu dituzte. Bost emango dituzte guztira; lehen hirurak 500, 300 eta 200 euroko diru sariarekin. Horiekin batera Xabier Ormazabal Saria eta herriko bildumarik onenarena nabarmentzen dira; bakoitzak 200na euroko saria du. Aurten ere Ostadar taldeko kide izandako Xabier Ormazabal zena gogoan izango dute, eta haren izena daraman atala alpinismoa ondoen islatzen duen irudiak eramango du.
Lanak urriaren 25era arte jasoko dituzte Zumarragako eta Urretxuko kultur etxeetan. Egile bakoitzak hiru argazki aurkeztu ahal izango ditu, CDan edo DVDan grabatuta, Jpg edo Tiff formatuan, eta gutxienez 300 pixeleko bereizmenarekin.
Baldintzak
Lehiaketaren baldintzak eta xehetasunak elkartearen webgunean (ostadar.org) jarri dituzte. Informazio gehiago jasotzeko lehiaketa@ostadar.org posta elektronikora idatzita ere eska daiteke.
Epaimahaiak azaroaren 28an jakinaraziko du erabakia, Ostadar Mendi Astearen barruan Zelai Arizti aretoan egingo den lanak proiektatu ondoren.
