Beatriz Perez zumarragarrak San Jose ikastetxean egin zituen oinarrizko ikasketak.
Ondoren La Salle-Legazpin administrazio-ikasketak eta, azkenik, Donostiara joan zen estetika ikastera. Lau urte eman zituen Aurori ileapaindegian lanean eta 1994an Xarmanki ireki zuen. 16 urte hauetan edergintza mundua asko aldatu dela dio. “Irudiari lehen baino garrantzia handiagoa ematen zaio. Egun gure bezeroen artean gaztetxoak eta gizonezkoak ere baditugu. Lehen txirrindulariak bakarrik etortzen ziren depilatzera eta aknea zuten gazteak ez ziren etortzen”.
Zer izan nahi zenuen umetan?
Nire lehengusuak andereño izan nahi zuela esaten zuela eta nik ez nuela batere argi oroitzen dut.
Aisialdian zer egitea atsegin duzu?
Denbora libre gutxi dut. Familiarekin egotea gustatzen zait.
Bizitzeko toki bat?
Urretxu-Zumarraga. Sekula ez naiz zumarragar peto-petoa sentitu, baina senarra urretxuarra da eta bera Urretxuren alde jartzen denean nik Zumarragaren alde egiten dut. Dena den, niretzat bi herriak bat dira.
Famatuen artean, nork uste duzu itxura ona ematen duela?
Letizia Espainiako printzesak.
Eta txarra?
Karmele Marchantek. Makillaje gehiegi erabiltzen du.
Ilehoriak ala beltzaranak?
Beltzaranak.
Egindako azken oparia?
Alabari nezeser txiki bat oparitu diot azkazalentzako esmaltearekin. Orain arte azkazalak jaten zituen eta ohitura hori uztea lortu du. Esmalteak azkazalak indartzen lagunduko dio.
Eta jasotakoa?
Soineko bat.
Data bat?
Seme-alaben jaiotza egunak: Semea Santa Isabel egunekoa da eta alaba urtarrilaren 3koa. Alabaren urtebetetze egunean ere jai hartzen dut beti.
Mutil eta neska izen bana?
Seme-alabenak: Xabier eta Ainara.
Zein egunkari irakurtzen duzu?
Noticias de Gipuzkoa.
Gustuko telebista saioa?
Telesailak ikusten ditut batez ere. Denbora-pasa gisa balio dutenak gustatzen zaizkit, umorezkoak. Bestela ere izaten dira triste egoteko nahikoa arrazoi! La ruleta de la suerte ere ikusten dut.
Bereziki gorroto duzuna?
Gran Hermano ez dut sekula ikusi.
Liburu bat?
Richar Paul Evans-en ‘El girasol’. Oparitu egin zidan, irakurri dudan azkena da eta oso gustura irakurri dut. Nobela erromantikoa atsegin dut, batik bat.
Pelikula bat?
‘El color purpura’ filmeak markatu egin ninduen. Bigarrengoz ikusten saiatu naiz eta ezin dut: tristeegia iruditzen zait. ‘Sonrisas y lagrimas’, berriz, askotan ikusi dut.
Soinu bat?
Pianoarena. Musika banda entzutea ere asko gustatzen zait.
Usain bat?
Udan, lurra lehorra dagoenean, euria egin ondoren sortzen dena.
Janari bat?
Pasta.
Ura ala…
Ura.
