Bihar, hilak 18, ospatuko da Museoen Nazioarteko Eguna. Ospakizuna borobiltzeko asmoz urtero antolatu ohi dituzte ekitaldiak Urretxun, zaletuen artean arrakasta izan ohi dutenak. Asteburuan egin den irteera mineralogikoan esaterako, 60 pertsonak hartu dute parte.
Museoa Kalera jolasa gaztetxoei zuzendutako egitasmoa da. Urretxuko eta Zumarragako merkatarien Bi-Tartean elkarteak eta museoak antolatu dute elkarlanean. Jolasarekin «sinergiak» sortzen dira kulturaren, turismoaren eta merkataritzaren artean. Bi herrietako 84 dendatako erakusleihoetan 44 harri eta beste hainbeste fosil banatu dituzte. Guztien ondoan fitxa teknikoetan informazioa jarri dute, eta parte-hartzaileek bilduma osatu beharko dute txartelekin. Bi bilduma daude aukeran. Hori egiten dutenek opariak jaso ditzakete.
Dendarien eta bezeroen arteko harremana sortzea eta indartzea, herria girotzea eta, batez ere, museoa dinamizatzea eta kalera ateratzea ditu helburu jolasak. Albumak kultur etxean utzi beharko dira, eta jolasari maiatzaren 21ean egingo duten zozketa-festarekin emango diote amaiera. Iparragirre plazan, museoaren alboko lorategian ospatuko dute ekitaldia, eta Urre, Lur eta Lagun dinosauroak izango dira. Jolasean parte hartzen duten guztien artean lau mineral eder eta USB memoria batzuk zozkatuko dituzte.
Arrain fosilen erakusketa
Museoaren sarreran, bestetik, Icitosaurio eta marrazo banaren fosilak egongo dira ikusgai hilaren 21era bitartean. Lehen pieza Txinan aurkitutako Guizhouizhthyosaurus bat da, 250 milioi urte dituen alea. Animalia hori historiako lehenengo ugaztuna izan zen, arrautzak errutetik kumeak amaren sabelean jaiotzen hasi baitziren lehen aldiz. Marrazo fosila, berriz, Scyliorhinidael familiakoa da. Kultur etxean erakusgai dagoena Libanon aurkitutako alea da, eta 100 milioi urte ditu.
Bihar, Museoen Nazioarteko Egunaren harira, egun osoan zehar eskainiko dituzte doako bisitaldi gidatuak.
