2009tik euskal sindikatuek deitutako seigarren greba izango da etzikoa. Greba orokorraren deialdia Euskal Herriko sindikatu gehienek egin dute –ELA, LAB, ESK, STEE-EILAS, EHNE, HIRU eta CNT–. Grebak krisi ekonomikoaren aurrean Gasteizko, Iruñeako zein Madrilgo gobernuen politikei kontra egiteko «modu bakarra borroka eta mobilizazioa» direla agerian utzi nahi du. Horrez gain, «urrunago joan eta alternatiba bat eraiki behar» dela diote sindikatuek, «lehen urratsa Euskal Herriko Eskubide Sozialen Gutuna burutzea izango da».
Goierriko LAB eta ELA sindikatuetako ordezkariek grebarako deialdia egin dute gaur Zumarragan zein Beasainen eta, bide batez, dagoeneko greba egingo dutela segurtatu duten enpresen, erakundeen nahiz eskolen zerrenda eman dute. LABeko Josu Amenabarrek sindikatuaren Zumarragako egoitzan adierazi duenez, «asanbladak egin dituzte jada hainbat enpresatan eta greba egingo dutela erabaki dute. Beste askotan gaur eta bihar bilduko dira erabaki bat hartzeko».
Aitor Goenaga ELAko Goierriko arduradunak eskatzen duten gutunaren nondik norakoa azaldu du: «Aldarrikapenerako soilik izan beharrean, euskal jendarte guztiaren eta burutzen ari garen borroka denak batzeko lehen pausoa izango da». Greba egitea eraginkorra den itaunduta, Goenagak erantzun du: «Jakin badakigu gauzak ez direla goizetik gauera aldatzen, greba baten ondoren ez da egoera berehala aldatuko». Amenabarrek gehitu duenez, «hau borroka dinamika berri baten hasiera da».
Grebak zer nolako jarraipena izatea espero duten galdetuta, Xabier Olaizola Goierriko ELAko metal arloko arduradunak esan du: «Goierriko herriek beti erantzuten dute, greba deialdiekin bat egin dute goierritarrek».
Mobilizazioak
Goierri garaiko herrietan lehenengo hitzordua 05:30erako deitu dute, Legazpiko industrialdean bilduko dira informazio piketeak. Beasaingo anbulategian 05:00etan elkartuko dira. 11:30ean Donostiako Anoeta zelaitik abiatuko den manifestaziora joateko deia egin dute sindikatuetako ordezkariek, eta 18:00etan manifestazioak egongo dira: Urretxun Areizaga-Kalebarren plazatik aterako da, Legazpin eta Beasainen plazatik abiatuko dira.
Atxiki diren enpresa, eskola eta erakundeen zerrenda bihar Goierriko Hitzan
