P { margin-bottom: 0.21cm; }Gerontologia zentroko langileei eskutitz bat bidali die eta gutun horretan hurrengo eskaera egiten die «interesen auto konposaketaren bitartez (?)» irtenbide azkar bat bilatzeko beharra adierazten die dagokien aldeei, «zalantzarik gabe, gure nagusien onerako izango baita». Gutun honen inguruan gogoeta egin nahiko genuke hiru mailatan: batetik oinarrizkoa, bestetik formei dagokiena eta azkena zentroak bizi duen egoerarena.
Hala ere, beste ezer baino lehen alkate jaunari adierazi nahiko genioke, beste behin ere, langileen lan eta bizi baldintzak erabat ahaztu dituela, eta dagoeneko Serrano alkatearekin bi aldiz gertatu zaigu gauza bera. Alkateak bere gutunean ondokoa dio: «…orotariko zerbitzu pertsonalizatua eta kalitatezkoa eskaini ahal izateko egoiliarrari, familiari eta inguru sozialari». Non kokatzen gaitu langileak? Beste behin ere gutaz ahaztu zara Alkate Jauna. Kezkagarria da Serrano Jauna, bigarren aldiz, gure aldeko planteamenduetan inplikatzeko eta konponbideak bilatzeko adierazten duzun borondate falta.
Edozein kasutan goazen oinarrira sinestezina baita, erditik kentzeko aitzakiaz, Gipuzkoako Foru Aldundiaren diru publikoarekin eta senitarteko zein egoiliarrek ordaintzen duten zerbitzu publiko pribatizatu bati buruz ari garela ahaztea. Are gehiago, egoera hori ontzat ematea eta zerbitzu sozialetara bideratutako diru publikoarekin negozioa bilatzen nahiz egiten duen enpresa baten interesak defendatzea alderdi sozialistako kide izanda.
Formei dagokionean ere eskas, Serrano Jauna, hala ere, ez dugu sorpresarik hartu zeure jarrerarekin, baina “ neurri” politikoa begi bistan uzten du. Dagoeneko maiatzaren 13tik gaude greba mugagabean, eta gehiengoa dira hitzarmena sinatzea lortu duten enpresak jada, gutxi gora behera hamaika dira oraindik hitzarmenik sinatu ez dutenak. Esan egia, onartu gure hitzarmenak ez diola euro bakar bat ere suposatuko Zumarragako Udalari eta, are okerrago dena, enpresa berari ere ez. Gauzak horrela, noren defentsan ari zara?
Eta, amaitzeko, gogorrena egin zaiguna aipatzera goaz, zure idatzian ondokoa diozu: «Zentro honetan arreta pertsonalizatuan oinarritutako eredua jarraitzen dute eta diziplina arteko profesionalez osatutako talde bikainak du zerbitzu horren erantzukizuna». Begirune gutxi azaltzen duzu gurekiko «diziplina arteko profesionaloi»–hau da, langileoi– , baita egoiliarren kolektiboari ere. Zaintza pertsonalizatua ezinezkoa da ratio nahikorik gabe, gauetan behar besteko langile egon gabe eta enpresaren emaitza ekonomikoetan oinarritzen den kudeaketa eredu batekin.
Animo Serrano Jauna, badakizu non gauden, Argixao egoitza alboan kanpatuta gaude egunero, goizeko zortzietatik iluntzeko zortzietara; han aurkituko gaituzu. Gatazkari behin betiko konponbide bat bilatzeko desiratzen gaude, eta gure lanera ahalik eta azkarren bueltatzeko irrikatzen. Gure lana eta gure lana ez dena harik eta ongien egiten baitugu bertan dauden egoiliarren onerako, baina Alkate Jauna ez ahaztu gauza guztiek dutela bere muga.
Ainitze Sudupe, Yolanda Estebanez eta Ines Mateos. ELAko ordezkariak Zumarragako Argixao egoitzan.
