Luis Orduña (Barañain, Nafarroa, 1980) Zumarragako Musika Bandaren zuzendari berria da. Lander Zurdok 25 urtean banda zuzendu eta gero, nafarrak lekukoa hartu berri dio. Tuba-jotzailea da Orduña, baina orain hiru urte eszedentzia hartu zuen Gasteizko Musika Bandan, eta zuzendari prestakuntzari ekin zion. Egun, Zumarragako Bandaz gain Sakanako (Nafarroa) Haize-Berriak banda eta Tolosako Santa Maria Kapera zuzentzen ditu.
Zer egiten du nafar batek Zumarragan?
Egia esateko, aurretik bizpahiru aldiz baino ez naiz egon Zumarragan. Haize-Berriak taldearekin banda topaketa batera etorri nintzen, eta inoiz Antioko kontzertuetan izan naiz. Ez nuen, beraz, Zumarraga gehiegi ezagutzen. Baina, bandan zuzendari baten bila ari zirela jakin nuen, eta proiektua aurkeztu nuen.
Zurdok iazko abenduan utzi zuen zuzendaritza, ordutik hilabete batzuk igaro dira. Nolakoa izan da aukeraketa prozesua?
Zuzendari izateko proiektua aurkezteko gonbitea egin ziguten lau laguni. Horietatik bi aukeratu zituzten, eta behin betiko proba kontzertu bana prestatzea izan zen. Bakoitzak bere kontzertua prestatu zuen, eta behin emanaldia eginda, Zumarragako Musika Bandako kideak bildu ziren, eta ni zuzendari hautatu ninduten asanbladan.
Tuba-jotzailea zara, baina tuba utzi eta zuzendari izateko ikasketak hasi zenituen.
Iruñeako kontserbatorioan tuba ikasi nuen. Musika ikasketak amaitu nituen, eta, bien bitartean, soziologia ikasi nuen. Jarraian, Bartzelonara joan nintzen Escola Superior de Musica de Catalunyan goi mailako ikasketak amaitzera, eta bueltan Gasteizko Musika Bandan tuba-jotzaile plaza lortu nuen. Orain hiru urte eszedentzia eskatu, eta Musikenen zuzendaritza ikasketak hasi nituen.
Zein da tubaren eta batutaren arteko aldea?
Musikari guztiak interpreteak gara. Ez da erraza taldean arraun egitea banakoa desagertu egiten baita. Banda batean ehun irizpide badaude, zuzendariaren lana irizpide horiek guztiak bateratzea da. Musikari bezala ezin duzu ardura hori zure gain hartu, eta ardura hori niretzat oso erakargarria da. Gasteizko Bandako beste tuba-jotzaileek «alde ilunera» pasa naizela esaten didate… Argiak eta ilunak dituen tokia da zuzendariarena, erantzukizuna itzela da, baina niretzat gozamena da.
Bihar elkarrizketa osoa Goierriko Hitzan
