Guztira 21 garagardo ezberdin izango dira aukeran; jatekoen artean aurten oilasko izterrak ere ba.
Ostegunean hasi eta igandera bitartean Garagardo Azoka antolatu du hamargarren urtez Urretxuko Lurra dantza taldeak Ederrena pilotalekuan. Aurreko urteetan baino egun bat gehiago egongo da irekita azoka «ostiralean jai dela eta ostegunetako pintxo potean jende asko ibiltzen dela aprobetxatuz» Leire Larrañaga dantza taldeko kideak esan duenez.
Aurten 21 garagardo ezberdin izango dira aukeran «horiak, beltzak eta gorriak», ohi bezala. Hala ere, aurreko urteetan aukeran ez zeuden «garagardo berri asko» sartu dituzte eskaintza berrian. Horien artean, «Iron Miden musika taldeak ekoizten duen bat». Alkoholik gabeko garagardoa ere izango da nahi duenarentzat.
Jatekoari dagokionez, ohiko ukondoa, saltxitxak eta sajoniar solomoaz gainera «oilasko hegoak eta oilako izterrak» ere izango dira berrikuntza moduan. Menuak 25 euroko prezioa izango du «iaz bezala, prezioak mantendu egin ditugu». Garagardo txartelak 3,80 eurotan salduko dituzte eta pitxarrak 1,50ean.
Lurra dantza taldeak 50 urte
Aurtengo berrikuntza handiena azoka ostegunean irekiko dela izango da. Urretxun pintxo pote eguna dela eta «azokan pintxoak eskainiko ditugu trago bakoitzarekin». Gainera, egun horretan garagardo erdiak eskatzeko aukera ere eskainiko dute. Azoka 18:30ean irekiko dute etzi, baita ostiralean ere, «larunbatean eta igandean berriz goiz eta arratsalde egongo da zabalik».
Urtero bezala zozketa ezberdinak egingo dituzte bertaratzen diren guztien artean. Gainera, hemendik bi urte barru Lurrak 50. urteurrena beteko duela eta «taldearen logoa duten kamisetak, jertseak, motxilak, ardo botilak eta kopak» jarriko dituzte salgai Ederrena pilotalekuan.
