Ordenantza fiskalak bere horretan alderdi guztien babesa jaso badute ere, hika-mika sortu du egun bat lehenago gaiaren inguruan Oihane Zabaletak eskainitako prentsaurrekoak.
Udal gobernuak ordenantza fiskalak aurkezteko egindako agerraldiak eztabaida sortu du Urretxun, urriko osoko bilkuran. Zergak eta tasak aho batez onartu dituzte, hala ere, alderdi guztiek batzordeetan elkarrekin landutakoak izan direlako. Orokorrean %1,5eko igoera izango dute 2014an Urretxuko ordenantza fiskalek, Oihane Zabaletak asteazkenean egindako agerraldian azaldu zuenez.
Alkateak ordenantza fiskalen nondik norakoak agertu eta gero hartu zuten hitza atzoko osoko bilkuran oposizioko alderdiek. Itziar Agirre EAJko bozeramalea haserre agertu zen udal gobernuak osoko bilkura egin aurretik eta gainontzeko alderdiei jakinarazi gabe ordenantza fiskalak prentsan aurkeztu dituelako. Prentsaurreko horretan “behin eta berriz esaten da udal gobernuak egindako proposamenak direla. Behin ere ez da aipatzen, batzordean alderdi guztien artean landutakoak direla”, esan zion alkateari.
Iritzi berekoa da PSE-EE alderdiko Javier Martin. Egindako batzordeak “perfektuak” izan direla eta prentsaurreko hori ez dakiela zertara etorri den esan zuen, “gaizki iruditzen zait puntuak zeuen buruari bakarrik ematea”, gaineratu zuen. Hamaikabat (H1!) alderdiko Luisan Tellezek ez zuen prentsaurrekoaren inguruko baloraziorik egin, “oraindik ikusi gabe” zuelako.
Oihane Zabaleta alkateak prentsaurrekoaren zergatia azaldu zuen, “horrenbesteko ezinegona” zertara zetorren ulertzen ez zuela esanez. Prentsaurrekoa, “herritarrek zergen eta tasen gaineko informazio zuzena eta garbia” izateko eman zela argitu zuen. Eta bide batez, alderdi guztiak zoriondu zituen “benetan egin den lana apartekoa” izan delako.
Hornidura elektrikoa
Landu ziren beste gaien artean energia elektrikoaren kontratazio espedienteari atxikimendua ematea onartu zuten alderdi guztiek. Bestalde, udal gobernuak udal igerilekuak eta Aldiri kiroldegia kudeatzen dituen Jaso kirol zerbitzuak enpresaren kontratazioan aldaketa bat egiteko proposamena mahai gaineratu zuen. Zabaletak azaldu zuenez, enpresak udalari egiten dion hilabetean behingo ordainketa periodikotasuna aldatzea eskatu dio. Alkateak azaldutakoaren arabera, “fakturatzeko orduak eta abonatutako orduen artean subrogatutako pertsonalaren artean desfase bat” argudiatu du enpresak. Fakturazioa hamabostean behin egitea eskatu du.
Alderdi guztiek aho batez onartu dute eskaera, baina guztiek azaldu dute gaiaren inguruko kezka. EAJko Itziar Agirrek “diruzaintza arazo bat badago arduraz jokatzeko beharra” dagoela esan zuen, eta langileek duten hitzarmena betetzeko enpresak gaia nola bideratuko ote duen galdetu zuen. PSE-EEko Javier Martinek ere “kontuz” ibiltzeko gaia dela gaineratu zuen, eta H1!-eko Luisan Tellezek “segituan konponduko den arazo puntual bat” izatea espero duela esan zuen.
