Bihar 18:00etan hasiko da txapelketa Ederrena pilotalekuan; pistoa haragi xehatuarekin da prestatu beharreko jakia.
Urretxuko eta Zumarragako udalek gazteentzako XVIII. sukaldaritza lehiaketa antolatu dute. Lehiaketa bihar arratsaldean jokatuko da, azken urteetan egin den moduan, Urretxuko Ederrena pilotalekuan. Ekimena bi udaletako gizarte zerbitzuek antolatzen dute eta DBHko 3. eta 4. mailetako ikasleei dago zuzenduta.
Aurten prestatu beharreko jakia pistoa haragi xehatuarekin izango da. Hala, talde bakoitzak kalabazina, piper gorria, piper berdea, tipula, tomatea, haragi xehatua, baratxuria, perrexila, gatza, irina eta olioa izango dituzte aukeran.
Aurkezpena eta goxotasuna
Osagai guztiak antolatzaileek erraztuko dizkiete parte hartzaileei. Talde bakoitzak behar dituenak aukeratu beharko ditu, nahi duen kantitatean, baina ezinezkoa izango da etxetik ezer eramatea. Talde bakoitzak jakia prestatzeko behar dituen tresnak eraman behar ditu. Epaimahaiak aurkeztutako jakien aurkezpena eta goxotasuna baloratuko ditu, errezeta bera baino gehiago.
Parte hartzaileek ordu eta erdiko epea izango du, 18:00etan hasita, platera prestatzeko. Ondoren mahaiak garbi eta txukun utzi beharko dituzte. Hiru ikastetxeetako 19 taldek eman dute izena jada. Neskez eta mutilez osatutako lauko taldeetan antolatuta arituko dira.
Plater onena prestatzen duen taldearentzat 250 euroko saria izango da, eta bigarrenarentzat 150 euroko beste bat. Gainera, partaide guztien artean lau pendrive zozketatuko dituzte eta tupper-ak ere banatuko dituzte, bakoitzak prestatutako jakia etxera eramateko.
