Bidegi elkarte publikoa eta Gipuzkoako Foru Aldundia GI-632 errepide berriko (Beasain-Bergara) azken bi zatiak egiten ari dira, eta ostiralean bertan Urretxu-Antzuola zatiko Deskargako tunelaren bi aldeak elkartzea lortu zuten, tunelaren zulaketa bideratuta.
Bidegi ari da Urretxu-Antzuola zatia egiten, hain zuzen Deskargako mendatea saihesteko tunela duena, eta ostiralean tunel horietako bat, Antzuolatik Urretxurako noranzkokoa, zulatzen amaitzen zuten; bi aldeak elkartuta baitaude jada. Tunela eraikitzerakoan hainbat arazo izan ziren, luiziak izan zirelako, baina arazo horiek konpondu dira eta lanak aurrera doaz, martxa onean. Tunela 650 metro luze da, norabide bakoitzean hodi bat du (bi errei norabide bakoitzean), eta oinezkoentzako bi larrialdi irteera izango ditu, tunelaren norabide baterako hodia beste norabidekoarekin lotuz.
Tunelaren zulaketa ostiralean amaitzen zela aprobetxatuz, Larraitz Ugarte Mugikortasuneko eta Bide Azpiegituretako diputatua Deskargako obran izan zen, eta bertan poza azaldu zuen obrak bide onetik doazelako. “Gipuzkoako Foru Aldundia eta Bidegi lan handia egiten ari dira GI-632 errepide berria 2015eko apirilerako errealitate izan dadin, eta gaurkoa bide horretan urrats garrantzitsua izan da. Errepide hau Aldundiarentzat oso garrantzitsua da, Gipuzkoa eta Euskal Herria egituratzerako estrategikoa delako, eta horregatik jarraitu du proiektu honekin. Gainera, obra eredugarri izatea ere nahi dugu, gauzak beste modu batera egin daitezkeela erakusteko: bai, lan arloan sindikatuekin elkarlanean lan hitzarmena bete dadin; bai, diru publikoaren kontrol zorrotza eginez”, adierazi zuen Ugartek ostiralean.
Urretxu-Antzuola zati berria 2011ko uztailean hasi ziren eraikitzen eta 30 hilabeteko epea dago lanak bukatzeko. Beraz, obra zibila bukatzeko epea 2014ko urria da, eta ondoren, instalazioetako obra egin beharko da. Lanak Bidegiren zuzendaritzapean egiten ari dira Amenabar eta Moyua enpresak eta 42,8 milioi eurotan (gehi Bez) esleitu zitzaien. Obra zuzendaritza Eptisa-Cinsak darama. Zati honek 2.760 metro izango ditu, norabide bakoitzean bi erreirekin, ibilbidean gehieneko aldapa %5ekoa izango da, eta punturik altuenetik baxuenera 29 metroko desnibela egongo da. Zati honen muturretan lotune bana izango da.
Antzuola-Bergara zatia
Beasain-Bergara ardatzeko azken zatia, Antzuola-Bergara, Gipuzkoako Foru Aldundia ari da eraikitzen, Moyua eta Antzibar enpresen bidez, eta 41 milioi euroko (gehi BEZ) aurrekontua du. Laguntza teknikoa, berriz, Girder eta Saitec enpresak ari dira egiten. Zati hau 2015eko apirilerako bukatzea aurreikusi da.
GI-632 errepide berriak, amaitutakoan, 23 kilometro izango ditu, eta norabide bakoitzean bi erreikoa izango da. Lehenengo zatia, Beasain eta Zumarraga arteko zatia, 2006an ireki zen. Bigarren zatia, Zumarraga-Urretxu zatia, 2012ko ekainean ireki zen.
