Urretxuko eta Zumarragako Mairi emakumeen elkarteak urteko batzarra egin berri du, egindakoaren balorazioa egin eta aurrera begira dituzten asmoei erreparatzeko. Mari Carmen Diez lehendakariaren hitzetan 2013ko balorazio «positiboa» egin du zuzendaritzak. Elkarteko bazkideak «pozik» daudela eta «askotariko ekintzak» prestatzen dituztela gaineratu du. 2014ari begira ildo beretik jarraitzeko asmoa agertu dute, «horrenbeste urteren ondoren ideia berriak izatea zaila» dela aitortu du Diezek, baina proposamen berrientzako ateak irekita dituztela gehitu du.
Mairi orain 25 bat urte sortu zen, batez ere «emakumeentzako topaleku izateko asmoarekin». Ordu hartan, 30 bazkiderekin hasi zuen bere ibilbidea elkarteak, eta «hitzaldiak, ikastaroak eta irteeraren bat» antolatzen zituzten. Denborarekin elkartea haziz joan da zentzu guztietan, «egun 180 bat bazkide» dira guztira eta antolatzen dituzten ekintzak ere biderkatu egin dira.
Antolatzen dituzten ikastaroak askotarikoak dira: «Sukaldaritza, patchwork, josketa eta dekorazio tailerrak, eskulanak, yoga…». Gainera, hileko lehenengo ostiralean kafe tertulia antolatzen dute Zumarragako Zelai Arizti kultur etxean eta hitzaldi bat hilero, Urretxuko kultur etxean, «hileko hirugarren astearteetan izan ohi da». Hain zuzen otsailaren 11n izango da hurrena, Nola bizi daitezke hiru belaunaldi pentsiodun baten soldatarekin izenburupean. Martxoari begira Emakumeen Astea ere antolatu dute: «Aurten martxoaren 3tik 9ra izango da, antzerkia, hitzaldiak, irteera, afaria eta Xera sariaren banaketa ekitaldia izango ditugu», zehaztu du Diezek.
Gizonezkoentzat ere bai
Emakumeen elkartea izanagatik, gizonezkoak ere ari dira pixkanaka taldera gerturatzen. «Bazkide egin berri da 45 bat urteko gizon bat, josten ikasten dabil orain, baina patchwork-a egitera iritsi nahi duela dio». Ez da kasu bakarra, dena den. Gainera gehienek uste dutenaren kontra, «neska gazte asko ere badauzkagu elkartean». Mairiko bazkide egiteak urtean 10 euroko kostua du eta nahi duenarentzat ateak zabalik daudela jakinarazi dute.
