Ekaina heldu da eta, utero bezala, Urretxuko eta Zumarragako gazteek egungo gaztetxearen urteurrena ospatuko dute. 12 urte bete ditu dagoeneko. Joan zen igandean antzerki saioa antolatu zuten eta asteburu honetarako hitzaldia, kontzertua eta film laburren rallya antolatu dituzte.
Hasteko, gaur, 19:00etan, Fracking ez! hitzaldia egingo dute. Ondoren, 22:30ean, Etxepare Rap-ek kontzertua eskainiko du. Bihar, berriz, Zeatikezpa! film laburren rallyaren bigarren ekitaldia egingo dute.
Lehiaketa hau Zarauzko (Gipuzkoa) gaztetxekoekin batera antolatzen dute, eta lehiakideek askatasunari buruzko iragarkiak egin behar dituzte. 10:00etan elkartuko dira, gaztetxean, eta antolatzaileek derrigor sartu beharreko objektuaren eta tokiaren berri emango diete. Grabatzeko eta editatzeko materiala parte hartzaileek ekarri behar dute. Gaztetxeak Interneterako lotura eta bazkaria eskainiko dizkie. Lanak 19:00etarako entregatu behar dituzte, eta ordu horretan ikusiko dituzte aurkeztutako lan guztiak.
Datorren asterako ere ekitaldi ugari antolatu dute. Asteazkenean, 19:00etan, Zintzilik irrati libreak 27 urte ez dira ezer! dokumentala emango du, eta ondoren gaiari buruzko mahai-ingurua egingo dute.
Ostiralean, berriz, Erdaldun berrien kluba antzezlanaz gozatzeko aukera egongo da. Lan hau AED Arrasateko euskaltzale taldeak ekoiztu du. Idoia Etxeberria oñatiarrak idatzi du gidoia eta Olatz Pagalday eskoriatzarra da aktorea. Publikoarengan euskararen erabileraren inguruko gogoeta bultzatu nahi dute, umorearen bidez.
Istorioko protagonista euskaraz pentsatzen, sentitzen eta diharduen neska bat da, eta horrek hamaika arazo sortuko dizkio egunerokotasunean. Antzerki saioa, gazte asanbladak eta Zintzo-Mintzo euskaltzale elkarteak antolatu dute.
Hilaren 14an, festa
Hilaren 14an, berriz, urteurreneko egun handia ospatuko dute. Eguerdian pilota txapelketako finalak jokatuko dituzte eta, ondoren, bazkaria egingo dute. Txartelak dagoeneko salgai daude. Bazkalostean Bidelapurrak taldeak folk kontzertua egingo du eta gauean Last Night, Cabbage City Rockers eta Tribute RHCP taldeek joko dute.
Last Night herriko talde bat da, Cabbage City Rockers ordiziarrek The Clash taldearen abestiak jotzen dituzte eta Tribute RHCP taldeak Red Hot Chili Peppers taldearen kantak.
Hilaren 15ean Betunizer taldeak kontzertua egingo du eta 20an bertso afaria egongo da. Agin Laburu, Asier Azpiroz, Nerea Ibarzabal eta Malen Amenabar bertsolariek abestuko dute.
Bukatzeko, hilaren 21ean maskulinitatea zalantzan jartzen duen tailerra egongo da gizonezkoentzat eta ondoren guatekea egingo dute. Aipatu, bestalde, asteartero, 19:00etan, mendiari buruzko dokumentalak emango dituztela.
