Datorren larunbatean Realaren kontra jokatuko duzu Eibar SD zure taldearekin Anoetan. Denboraldiaren lehenengo zatiko emaitzei erreparatuta, talde txikia handi egin al da eta handia txiki?
Gu talde txikia gara oraindik ere. Egia da inor gutxik espero zuela lehenengo mailako gure estraineko denboraldia hasi genuen bezala hastea eta, gaur-gaurkoz, gauden tokian egotea. Edozein kasutan, Eibar talde txikia da.
Larunbateko derbiak zirrara berezia sortzen al dizu?
Bai, zalantzarik gabe jokalarioi emozio berezia eragiten digu. Bi taldeen artean lehia gutxi dago eta derbi polita izango da.
Zale batek baino gehiagok bihotza erdibituta izango du Anoetako harmailetan?
Zale askoren lehenengo taldea Reala da, baina azkenaldian Eibarrek bigarren tokia irabazi du zale askoren bihotzean. Athleticeko jarraitzaile asko ere gurekin dago. Eta, horiez guztiez gain, Eibarko jendea dago. Eibarren ilusio berezia sortu da taldearen inguruan. Ilusio hori sumatu egiten da hango kaleetan eta gu, jakina, zuzen-zuzenean ukitzen gaitu.
Ez da batere erraza Eibarko elastikoa aurkitzea.
Orain lehenengo mailan gaude eta prentsan toki gehiago dugu, gehiago hitz egiten da gutaz eta elastikoen eskaria handiagoa da.
Ohitu al zara jada egoera berrira?
Poliki-poliki ohitzen ari naiz. Aldatu den gauza bakarra da ezagunagoa naizela. Gozatzen ditugu lehenengo mailan jokatzeak aurrean jarri dizkigun aurkariak eta aukerak ere bai. Bestela, Zumarragan bizi naiz, beti bezala, eta nire bizitza, oro har, ez da gehiegi aldatu.
Atzera eginez gero, bigarren mailan zeundetenean lehenengora iritsiko zinetela esanda, sinetsiko al zenuten?
Ez, inondik inora. Bigarren maila B utzi, eta bigarren mailara igo ginenean lehenengora igotzea ezinezkoa egiten zitzaigun. Baina, gauzak nolakoak diren eta hemen gaude, lehenengo mailan.
Zein da zuen erronka?
Gure erronka berrogei puntuen hesia pasa, eta ahal bezain azkar lehenengo mailan geratuko garela bermatzea da. Borroka horretan gaude.
Zer sentitu zenuen lehenengo mailako zelai erraldoietara atera zinen lehenengoetan?
Hasieran liluratuta geratzen zara. Baina behin partida hasita, jokoan zentratu eta hor jartzen duzu arreta osoa.
