Izena aldatuta dator aurtengoan Goierri garaiko mendi lasterketa. UZ Trail deitu diote eta izenaz gain, beste hainbat aldaketa ere egin dizkiote inoizko korrikalari gehien hartuko dituen ekitaldiari. Hain zuzen, 275 lagun abiatuko dira Urretxuko eta Zumarragako Areizaga-Kalebarren plazatik bihar, 16:00etan.
Izen berria «erakargarriagoa eta gogoratzeko errazagoa» dela diote. Asfalto bide guztiak ibilbidetik kendu dituzte eta mendi bideetan baino ez dituzte egingo ibilbidearen 22 kilometroak, «gure lasterketan pista eta asfalto asko zegoela-eta parte hartzaile asko kexu ziren aurreko urteetan». Aurtengo ekitaldia gogorragoa ere izango da, «gure mendietan ez dago kilometro bertikalik egiteko aukerarik, baina Izazpi eta Irimo aurpegirik pikoenetatik igo beharko dituzte».
UZ Trailek hartuko duen ibilbide nagusian, luzea, Beloki, Izazpi (940 metro) eta Irimo (900 metro) joko dituzte korrikalariek Izazpitik hasita. “Zumarragako eta Urretxuko mendi eta txokorik ederrenak zeharkatuko dituzte, Antio eta Santa Barbara tartean”. Helmuga Areizaga-Kalebarrenen egongo da. Horren trebatuta ez dauden korrikalarientzat proba motzagoa prestatu dute. Hasiera ordua berbera da bietan.
Faboritoak
Lasterketa irabazteko faboritoak zeintzuk diren esaterakoan, emakumezkoetan “ikusteko” dagoela esan dute antolatzaileek, “emaitza euskal selekzioko kideek zein gainerakoek erakusten duten mailaren araberakoa izango da”. Izen batzuk aipatu dituzte halere: Sandra Sevillano, Aitziber Ibarbia eta Elena Calvillo.
Gizonezkoetan Aritz Egea urretxuarra faboritotzat jo dute, are gehiago Zegama-Aizkorrin egindako lan bikainaren ostean. “Lehenagotik badaki, gainera, herrian irabaztea zer den eta, ziur aski, ibilbidea beste inork baino hobeto ezagutuko du”.
