Goierri kirol elkartearen saskibaloi sailaren lehenengo taldeak lauko finala jokatuko du asteburu honetan Donostiako Tecnum unibertsitatean (Ibaeta), Lehen Mailara igotzeko. Finalaurrekoa larunbatean jokatuko dute, 16:00etan, Irungo Carnicas San Marcial-Errobide taldearen aurka. Beste finalerdia Mungia eta Oñatiko Natra-Aloña Mendik jokatuko dute, 18:00etan.
Urretxu eta Zumarragakoek, irundarren aurkako partida irabazten badute, igandean jokatuko dute finala: 12:00etan toki berean. Finala jokatzeko sailkatzen badira, 10:15ean autobus bat irtengo da Zumarragako Elizkaletik. Zaletuek autobus horretan joateko aukera edukiko dute.
Goierri-Verkol taldeak EBA ligan jokatu zuen, baina bere tokiari uko egin zion baten ordez izan zen. Bestelakoan, Lehen Maila izan da ezagutu duen maila gorena. Oscar Gonzalez entrenatzaileak igotzeko aukerak dituztela uste du. «Ligako lehenengoa zuzen igo da eta hurrengo lauok lauko finala jokatuko dugu. Ligan bosgarren sailkatu ginen, baina hirugarrenarekin eta laugarrenarekin berdinduta. Bigarrena Irungo taldea izan zen, baina partida bat irabazi egin genion eta bestean hiru puntu azpitik bakarrik geunden minutu baten faltan. Hori dela eta, lauko finala irabazteko aukera dugula uste dugu».
Goierri-Verkol talde gaztea da azkar jokatzea gustatzen zaio. «Bi entrenatzaileok 25 eta 26 urte ditugu eta bi jokalarik bakarrik dituzte 23 urte baino gehiago. Ez gara oso altuak. Borroka eta intentsitatea dira gure armak. Joko azkarra egiten saiatzen gara, arerioa deseroso egon dadin».
