Euskal Gizataldeen Mundu Batzarreko parte hartzaileak Urretxun egon dira gaur. 21 herrialdetako 100 lagun baino gehiago etorri dira. Izan ere, Iparragirre oso maitatua da diasporako euskaldunen artean. Iparragirreren estatuaren aurrean argazkia atera dute, dantzari batek aurreskua dantzatu du, Iparragirreren jaiotetxearen azpian berari eta bere emazte Anjelari buruzko azalpenak entzun dituzte eta Gontzal Mendibilek Iparragirren kanta batzuk abestu ditu parrokian. Bukatzeko, hilerrira joan dira. Bertan, mausoleoan lore sorta bat utzi dute eta Gernikako arbola eta Agur jaunak abestu dituzte. Mausoleoan Gernikako arbolaren kimu bat dago eta bere ezkurrak hartu dituzte oroigarri gisa.
