Iragarpena ez da bete eta Urretxu eta Zumarragara etorri direnak eguraldi txukunaz gozatzen ari dira. Goizeko 09:00etatik ez du ia euririk egin eta, tenperatura epela lagun, jendea feriaz gozatzen ari da. Etxean gelditu denak ez du aitzakiarik, beraz. Urretxu eta Zumarragan ongi etorriak izango dira.
13:30ean lehiaketetako sariak banatuko dituzte Areizaga-Kalebarren plazan eta artzain txakur erakustaldia egongo da (antzarekin) Zubimusu plazan. Arratsaldean pilota partidak jokatuko dira Ederrena pilotalekuan. Lehen partida 17:30ean hasiko da. Binakako Promozio txapelketakoa izango da. Peña II eta Arangurenek, Egiguren V eta Erostarberen aurka jokatuko dute. Bigarren partida binakako txapelketa nagusikoa izango da: Bengoetxea VI eta Mariezkurrena IIk Ezkurdia eta Martijaren aurka jokatuko dute.
Bukatzeko, 18:00etan idi proba saioa egongo da Zumarragako Euskadi plazan. Asier Izagirre (Ipeñarrieta), Asier Zubillaga eta Iñaki Irigorasen idiak lehiatuko dira.
