Legez besteko proposamena aurkeztu du Eusko Legebiltzarrean
EH Bilduk legez besteko proposamena aurkeztu du Eusko Legebiltzarrean Zumarragako anbulatorioko etenik gabeko arreta gunea premiaz irekitzea eskatzeko. Osakidetzak martxoan itxi zuen, koronabirusari aurre egiteko. Irailean irekiko zuela agindu zuen, baina oraindik ez du ireki. Urretxuar eta Zumarragarrak telefonoz artatzen dituzte eta aurrez aurre egotea ezinbestekoa denean Beasaingo anbulatoriora edo ospitalera bidaltzen dituzte.
EH Bilduk idatzizko galderen bidez argibideak eskatu zituen Eusko Legebiltzarrean, baina ez dute erantzunik jaso. “Osasun publikoko arduradun, profesional eta aditu guztiek diote etenik gabeko arreta guneak funtsezkoak direla, arreta komunitarioaren ikuspuntutik eta ospitaleetako larrialdiak ez saturatzeko. Itxirik mantentzea ez du zentzurik. Kontrakoa egin beharko litzateke: indartu. Zumarragakoa itxita edukitzea oso larria da. Erabaki horren atean osasun irizpideak baino, irizpide ekonomikoak daude edo planifikazio, baliabide eta pertsonal faltaren aurrean gaude”, dio EH Bilduk.
Lanean jarraituko dutela aurreratu dute. “Eusko Legebiltzarreko, Urretxuko eta Zumarragako EH Bildu herritarron osasuna babesteko elkarlanean ari gara. Ekimen gehiago jarriko ditugu martxan eta herritarren inplikazioa ere garrantzitsua izango da. Izan ere, herritarren bultzada handia eta ekimen politikoa egon den herrietan etenik gabeko arreta gunea berriz martxan jartzea lortu dute”.
