Zumarraga eremu gorrian dagoenez atzo gauerditik, baimendutako kasuetan bakarrik, sartu-irten daiteke. Larunbateroko azokak jende ugari erakartzen du Zumarragara, baina gaur ez da izan horrelakorik.
Zumarraga eremu gorriko herrien zerrendan sartu denetik, ezer ez da berdina Urretxun eta Zumarragan. Zumarragarrak Zumarragatik ezin dira irten, eta beste herrietakoak ere ezin dira Zumarragan sartu, ezta Urretxukoak ere. Herritarren artean ez dago beste hizpiderik eta metro gutxiren tartean, oso irudi desberdinak ikus daitezke. Esate baterako, Zumarragan tabernak itxita zeuden eta Urretxun irekita.
Herri batetik besterako pasaguneetan gainera, tarteka udaltzainak ikus daitezke herritarren joan-etorriak kontrolatzen, eta Ertzainak berriz, autoenak.
Zumarragako larunbateroko azoka bi herrietako herritarren arteko topalekua izaten da, baina gaurkoan, zumarragarrek bakarrik izan dute azokako produktuak erosteko aukera, eta saltzaileek nabaritu dituzte jaurlaritzak hartutako azkeneko neurriak.
Arduraz jokatzeko deia
Egoera berri horren aurrean, zumarragarrei arduraz jokatzeko eskatu die Mikel Serrano Zumarragako alkateak. “Denok gure esku dagoen guztia egin behar dugu. Guztion ardura da gauzak ondo egitea. Zumarragar gehienok gauzak ondo egin ditugu. Erantzukizunez jokatu duten horiei guztiei animoak eman nahi dizkiet. Egoera zein larria den ulertu ez dutenei, arduraz jokatu ez dutenei, berriz, erantzukizunez jokatzeko eskatu nahi diet. Guztion ardura dela diogunean, ez dira hitz hutsak”.
Bi udalerriak bakar bat bezala
Bestalde, Urretxuko udalbatzak gutun bat bidalia dio LABIri, bi udalerriak bakar bat bezala har dezaten eskatzeko, “bestela neurriak betearaztea ezinezkoa delako. Oraingoz ez dute aintzat hartu.
-
- Argazkia: Gotzon Aranburu.
