Maite Aguado gazte urretxuarrak Japonia eta bertako kultura maite ditu. Bi aldiz egon da Asiako herrialde horretan eta Japoniera ikasten ari da. Bertan urtebete emateko bisa berezia lortu du.
Euskaraz hitz egiten ikasi duten japoniarrak askotan ikusi ditugu telebistan, baina japonieraz hitz egiten ikasi duten euskaldunak ere badira. Maite Aguado urretxuarra, adibidez. Japonia eta bertako kultura maite ditu eta bi aldiz egon da Asiako herrialde hartan.
Aguadok Historia ikasi zuen. «Historian lizentziatua naiz, baina Filologia Japoniarra ikastea edo Asia Ekialdeko Ikasketak egitea ere buruan izan nuen. Garai hartan ikasketa horiek ez zeuden oso garatuta eta Historia ikastea erabaki nuen. Ondoren, master bat egin nuen, museologian eta kultura ondarearen kudeaketan».
Bartzelonako museo eta kultura zentroetan lan egin du, informazio puntuetan eta gidari bezala. Egun Urretxun bizi da eta kultur arloko enpresa batean lan egiten du. Gainera, japoniera ikasten ari da. «Unibertsitate garaian hasi nintzen, baina garai hartan ez zegoen japoniera ikasteko aukera handirik. 2014an berriro ekin nion, Bartzelonara joan nintzenean», azaldu du urretxuarrak.
ETBren eragina
Baina… nolatan Japoniarekiko halako miresmena? «Japoniarekiko dudan miresmena Asiako beste herrialde batzuetara hedatzen ari da: beste herrialde batzuk ere gustuko ditut. Nire lehen kontaktua Japoniako animea (marrazki bizidunak) izan zen, baina ez naiz oso otakua (frikia). ETBn Doraemon, Dragoi Bola… ematen zituzten eta asko gustatzen zitzaizkidan. Hala, manga (komiki japoniarra) ferietara joan izan naiz, baina azken urte hauetan nahiko utzita dut. Musika japoniarra ere asko gustatzen zait eta zineklubak hango zinemaz gozatzeko aukera eman dit».
Japonia beti izan du gustuko, baina 15 urterekin bertara joan zen eta orduan maitemindu zen herrialde hartaz eta bertako kulturaz. «Nire izeba Triniren ahizpa, Maria, Japonian bizi zen. Ahizpa eta biok bisitan joan ginen eta herrialdea erakutsi zigun. Kultura, artea, jendea, hizkuntza… dena interesgarria iruditu zitzaidan».
Are gehiago, herrialde perfektua iruditu zitzaion. «Zerbait asko gustatzen zaizunean, idealizatu egiten duzu. Herrialde perfektua iruditu zitzaidan: errespetua, protokoloa, komunitate izaera, kanpotarrekin abegikorrak dira… Baina bertako jendea eta kultura ezagutu ditudan heinean, ez dela horren herrialde perfektua ikusi dut. Dena den, zerbaitekiko pasioa duzunean, akatsak ere onartzen dituzu. Gainera, oso herri erakargarria da. Kontraste nabarmenak ditu, mendebaldeko bizimoduaren antzekoa dute, baina aldi berean gure oso ezberdinak dira».
Aguadok Japoniarekiko interesa geroz eta handiagoa dela uste du. «Herrian bertan Japoniarekiko interesa duen jende gehiago dago. Animezaleak, otakuak… ezagutzen ditut».
Dena den, inork ez du eraman Japoniarekiko pasioa berak bezain urruti. Urte asko daramatza japoniera ikasten eta B2 mailan dago. «B2 mailako klasean nago, baina nire maila erreala B1 dela uste dut. Eskolan gramatika, hiztegia… lantzen ditugu, baina zailena hitz egitea da eta hori da gutxien lantzen dena. Hori dela eta, hizketa klaseetara ere joaten naiz. Bartzelonan japoniarrekin gelditzeko aukera eduki nuen, turista japoniarrekin ere hitz egiten nuen…».
2019an egon zen azkenekoz Japonian. Ordurako, hizkuntza nahiko ondo menderatzen zuen. «Lagun batekin joan nintzen. Korea eta Japonia bisitatu genituen. Hizkuntzarekin nahiko ondo moldatu nintzen».
Itzultzeko asmoa du. «Working Holidays bisa eskatu nuen eta onartu egin zidaten. Pandemia dela eta, ezin ezin nintzen joan. Aurki joan ahal izatea espero dut. Bisa horrekin urtebete eman dezaket han. Helburua bertan lan egitea eta hizkuntza hobetzea da. Ondoren, enpresa batek lan bisatua egiten badit, denbora gehiago geldituko naiz».
Euskaldunak Japonia ezagutzera animatu ditu. Baita hango zinema ikustera ere. «Netflixen frikikeria asko daude, baina Hirokazu Koreedaren eta Naomi Kawaseren lanak, besteak beste, oso ondo daude. Bestalde, egia da euskarak eta japonierak antzekotasunak dituztela: aditza beti bukaeran jartzen dute eta sujetua hasieran. Gainera, hitz asko antzekoak dira».
