Goizane Alvarez Kirol zuzendariak Zumarragako futbol zelaia bisitatu du. Obra duela 10 egun bukatu zuten, eta azken bi asteburuetan Urolaren taldeek Argixaon jokatu dute
Zumarragako Udalak Argixao futbol zelaiko belar artifiziala aldatu du. Lanak duela 10 egun bukatu ziren eta azken bi asteburuetan Urolako taldeek bertan jokatu dituzte etxeko partidak. Aurrekontua 284.000 eurokoa izan da eta Gipuzkoako Foru Aldundiak %60ko diru-laguntza eman du. Goizane Alvarez aldundiko Kirol zuzendariak Argixao bisitatu zuen atzo, Mikel Serrano alkatearekin.
Serranok eskerrak eman zizkion aldundiari eta «bereziki» Arkaitz Millan diputatuari eta Alvarezi. «Beraiei esker lortu dugu diru-laguntza».
Argixaoko belar artifiziala 1991n jarri zen. 2005an lehenengoz berritu zen eta 2021ean bigarrengoz berritu da. «2005ean ez genuen laguntzarik jaso. Oraingoan azken belaunaldiko belarra jarri dugu. Ez du kautxurik behar eta, beraz, jasangarriagoa da. Bestalde, ureztatze sistema lur azpian dago eta ureztatzeko orduan bakarrik ateratzen da aire zabalera».
Beste lan batzuk
Serranok Argixaon egindako beste bi obra gogoratu zituen: atletismo pistaren berritzea eta Luis Urdangarin futbol zelaia. Bi obra horiek egiteko ere aldundiaren laguntza jaso genuen. Eskerrak eman nahi dizkiot».
Alvarezek belar artifiziala aldatzea ezinbestekoa zela onartu zuen. «Eskerrak eman nahi dizkiot Mikeli, zelaia nola gelditu den ikustera gonbidatu nauelako. 16 urte igaro dira belarra azkenekoz aldatu zenetik. 16 urte asko dira. Belarra aldatu beharra zegoen, neska-mutikoen segurtasuna bermatzeko», aipatu zuen Kirol zuzendariak.
Jendea kirola egitera animatu zuen. «Pandemian jende askok kirola egiteko ohitura galdu du. Batez ere, nerabeen artean. Ohitura hori berreskuratu beharra dugu eta horretarako instalazio egokiak eskaini behar dizkiegu. Zumarragako Udalak kirol instalazioetan inbertitzen jarraitzera animatu nahi dut».
Bai Alvarezek eta bai Serranok Urolak 50. urteurrena ospatu behar duela gogoratu zuten. «Inaugurazio ekitaldia egin nahi dugu eta 50. urteurrenak merezi duen inaugurazio bat izango da. Argixaoren inaugurazio ekitaldian Realak eta Eibarrek jokatu zuten, baina Realaren mutilen lehen taldea ekartzea zaila izango da, ez baitu belar artifizialean jokatzen», esan zuen alkateak.
