Zumarragako Udaleko gobernu taldearen eta oposizioaren arteko harremana okertu egin da. Astearteko osoko bilkuran elkarri mokoka aritu ziren, mozio baten kontura.
Ura nahasita dator Zumarragako udaletxean. Gobernuaren (PSE-EE) eta oposizioaren (EH Bildu, EAJ eta Elkarrekin Zumarraga) arteko harremana okertu egin da eta astearteko osoko bilkuran elkarri mokoka aritu ziren, PSE-EEren mozio baten harira.
Duela aste batzuk oposizioko hiru alderdiek prentsa ohar bat kaleratu zuten eta bertan alkateari errespetua eta jarrera aldaketa sakona eskatu zioten. Handik egun batzuetara, gobernu taldeak salaketa faltsuak egitea leporatu zion oposizioari.
Asteartean beste behin agerian gelditu zen giroa gaiztotua dagoela. PSE-EEk mozio bat aurkeztu zuen urgentziazko prozeduraz, eguneko gai zerrendatik kanpo. Mozioa adinekoen bizitza kalitatearen aldekoa zen eta oposizioko alderdiek edukiaren alde daudela esan zuten, baina mozioa aurkezteko moduaren aurka azaldu ziren. Hala, EH Bildu, EAJ eta Elkarrekin Zumarragak abstentzioa eman zuten. Beraien ustez, gaia aurretik landu behar zen eta deklarazio instituzional gisa aurkeztu.
Mozioan, udalak erakunde eta enpresei adineko aurrez aurreko zerbitzua eskaintzeko eskatzen die eta merkatariei eta ostalariei adinekoak kontuan hartzeko (irekitzeko errazak diren ateak, aulkiak eserita itxaron ahal izateko, letra handiak…). Bestalde, jaurlaritzari Zumarragako anbulatorioa eguneko 24 orduetan irekitzeko eskatzen dio.
Udalak, bere aldetik, adinekoei gauzak errazten eta beraien beharrak kontuan hartzen saiatuko da. Gainera, merkataritzari eta ostalaritzari zuzendutako sentsibilizazio eta informazio kanpaina egingo du.
Mikel Serrano alkateak mozioa premiazko prozeduraz aurkeztearen arrazoia azaldu zuen. «Zumarragako biztanleen %25ak 65 urte baino gehiago ditu eta %10ak 80 urte baino gehiago. Neurriak lehenbailehen hartu behar dira».
Elkarrekin Zumarragako Ines Benitez mozioaren edukiarekin ados daudela esan zuen. Gauzak egiteko moduarekin ez, ordea. «Ezin ditugu bankuak eta merkatariak eta ostalariak zaku berean sartu. Bestalde, anbulatorioko Etengabeko Arreta Gunearen gaiak ez die adinekoei bakarrik eragiten. Denoi eragiten digu eta bere mozioa merezi du».
EAJko Josu Idigorasek ere mozioa aurkezteko modua kritikatu zuen. «Ostiralean osoko bilkuraren deialdia jaso genuen eta bertan ez zen mozioa agertzen. Atzo (astelehena) izan genuen mozioaren berri. Egokiena gaia patxadaz lantzea eta deklarazio instituzional gisa aurkeztea izango litzateke. Edukiaren %95ean ados gaudenez, ez litzateke zaila izango».
Pentsiodunei aitortza
EH Bilduko Josu Aztiria EAJ eta Elkarrekin Zumarragarekin bat etorri zen. «Irisgarritasunaz hitz egiten duzue, baina mozioa gaztelania hutsean bidali duzue. Bestalde, zaurgarritasunaren ikuspegi murritza duzue: desberdintasun ekonomikoak dira pertsonak zaurgarri bihurtzeko faktore nagusia. Ez da adinekoei buruz bakarrik hitz egin behar. Eta merkatariei eta ostalariei ezin zaie konpainia elektrikoei eta bankuei bezainbeste eskatu. Udalak, eskatzeaz gain, egin beharra du. Horren jarraipena egingo dugu. Bukatzeko, astero kontzentrazioetan parte hartzen duten pentsiodunek udalaren errekonozimendua merezi dute. Horregatik dago gai hau agenda sozialean».
PSE-EE alderdiko Rosa Maizak azaroan EH Bilduk mozio bat modu berean aurkeztu zuela gogoratu zuen. «Orduko hartan guk bakarrik kritikatu genuen». Serranok gainontzeko alderdiek ere adinekoen aldeko mozioak aurkezteko aukera eduki dutela gehitu zuen. Benitezek mozioa hauteskundeei begira aurkeztu izana leporatu zion. «Guk abstentzioa emateak mesede egin dizu, hala mitina egiteko aukera eduki baituzu. Oposizioa hauteskundeei begira dagoela diozu gero…».
