Saria Landaola federazioak ematen du, Gipuzkoako landa garapen proiektuei errekonozimendua egiteko
Aurten ere, Gipuzkoako landa garapen proiektuei errekonozimendua egin asmoz, Landaola federazioak Landaola Sariak antolatu ditu. Sari banaketa gaur eguerdian izan da Berastegin eta Zumarragako azokak Erakunde Publikoaren saria irabazi du. Zumarragako azoka bertako produktuak, kultura eta balioak eta Zumarragako aniztasuna batzen dituelako saritu dute.
Beste bost hautagaiak Hondarribiko Udala (Bidez-Bide, landa-eremurako eskaripeko garraio-zerbitzua), Zubillaga-Oñati hiltegia (haragiaren balio katean hiltegiko zerbitzua hobetzeko egindako lanagatik), Eibarko Udala (Errebal plazako azoka), Amezketako Udala (ondare kultural eta naturala biltzen duen Pello Zabala gunea) eta Zarauzko Udala (merkatu plazaren eraberritzea) ziren.
Saria emateko garaian, honako alderdiak kontuan hartu dituzte: proiektuak eredugarri izateko dituen baldintzak, proiektuak eragiten dion landa eremuko biztanlego eta sortutako lanpostu kopurua, duen zabaltzeko aukera eta izan duen oihartzuna, edota eskualdeko landa garapen elkartearekin izandako lankidetza.
Landaola, Gipuzkoako landa eremuaren garapenaren alde lan egiten duen elkartea da. Irabazi asmorik gabeko erakunde hau, Gipuzkoako sei Landa Garapen Elkartek osatzen dute: Behemendik, Deba-Garaiak, Debemenek, Goimenek, Tolomendik eta Urkomek.
