Zumarragak eskuzko Herriarteko Txapelketan parte hartuko du. Lehen kanporaketa Ataunen aurka jokatuko du. Joaneko partidak ostiralean jokatuko dituzte, 19:00etan, Beloki pilotalekuan.
Parte hartu ahal izateko, herri bakoitzak kadete, gazte eta senior mailan bikote bana aurkeztu beharra du. Pilotari guztiek herrian erroldatuta egon behar dute. Gipuzkoako Federazioak txapelketan izena eman duten herri guztien artean zozketa egiten du eta joan-etorriko kanporaketa sistemaren bitartez jokatzen da txapelketa. Herri bakoitzean hiru partida jokatzen dira, kadete, gazte eta senior mailakoak. Guztira sei partida dira, hiruna herri bakoitzean eta partidarik gehien irabazten dituen herriak egiten du aurrera.
Txapelketa hau ez da arrotza Zumarragarentzat, 1970eko eta 1971eko edizioak irabazi baitzituen. 2013, 2014, 2015 eta 2016an jarraian parte hartu eta gero, talderik atera ezinik egon da Zumarraga, baina aurten azken sei urteetako lehorteari amaiera emango dio.
Pilotari eta pilotazaleentzat oso lehiaketa berezia izaten da Herriartekoa, taldean jokatzen baita eta pilotariek beraien herria defendatzen baitute. Herritarren babesa oso garrantzitsua izaten da eta Beloki elkarteak zumarragarrei deialdia egin die.
Zumarragak gomazko paleta modalitateko Herriarteko Txapelketan ere parte hartuko du. Lehen kanporaketako joaneko partida ostiralean jokatuko du, 18:00etan, Oiartzunen. Txapelketa horretan ere hiru partida jokatzen dira, baina pilotari guztiak senior mailakoak dira. Lehenengo partida banaka jokatzen da kantxa osoan, bigarren partida binaka jokatzen da eta hirugarren partida banaka baina lehen zazpi koadroen barruan.
Eskuzko taldea Mikel Damian eta Eneko Garcia kadeteek, Julen Armaolea eta Oier Plazaola gazteek eta Josu Viana eta Ander Quina seniorrek osatzen dute.
Gomazko paletako taldea Mikel Rodriguez, Mikel Egiburu, Alberto Garcia de Albeniz eta Beñat Agirrek osatzen dute.
