Zazpi herritarrek parte hartu zuten eta seik proba bukatzea lortu zuten
Atzo Zegama-Aizkorri mendi maratoia egin zen. Zazpi herritarrek parte hartu zuten eta horietatik seik bukatu zuten. Igone Campos erretiratu egin zen.
Aritz Egea Caceres euskaldun onena izan zen, 19. postuan. Bere denbora, 4:05:18. Imanol Inza Gisasola 135. postuan sailkatu zen (5:08:50), Aitor Martinez Baraiazarra 266. (6:25:02), Iker Aleman Dominguez 271. (6:33:03) eta Jon Mikel Mendia Zufiaurre 321. (7:01:05).
Elgoibarren bizi den Mayi Mujika Errasti urretxuarra 17. emakumezko onena izan zen (5.20:25). Euskaldunen artean, 4. onena izan zen.
Mujika oso gustura dago egindako lanarekin. “Beldurrarekin joan nintzen, eguraldiagatik, baina asko gozatu nuen. Lokatza gustuko dut eta atzo inoiz baino gehiago gozatu nuen. Jaitsieretan oso gustura aritu nintzen. Hiru aldiz egin dut Zegama-Aizkorri eta atzo nire denbora onena hobetu nuen, bost minututan. Denbora hobea egin behar nuen, baina Urbiako itzulian belauneko arazoekin hasi nintzen. Ikusle batek Espidifen bat eman zidan eta jarraitzea lortu nuen”.
Campos, berriz, penatuta ageri da, noski. “Aurreko asteburuan bihurritua egin nuen, Zegama-Aizkorri prestatzen ari nintzela. Aste osoa fisioterapeutarengana joaten eman nuen, baina ezin izan nuen osatu. Jaitsieran mina ematen zidan eta Aizkorrin erretiratzea erabaki nuen”.
