1975ean Bakearen Lasterketako etapa bat irabazi zuen eta lasterketa horren sorreraren 75. urteurrenera gonbidatu dute
Juan Jose Moral, maillot horiarekin, Gerako estadioan, bere semeekin eta Alemaniako lagunekin Altzairuzko Oihalaren garaian, oso gutxi ziren Ekialdeko Europako herrialdeetara joateko aukera zuten mendebaldeko europarrak. Juan Jose Moral txirrindulari zumarragarra horietako bat izan zen. 1975ean Bakearen Lasterketan (ekialdeko herrialdeetako Tourra) parte hartu zuen Espainiako selekzioarekin eta bigarren etapa irabaztea lortu zuen, ihes eginda. Helmuga Alemaniako Errepublika Demokratikoko Gera hiriko estadioan zegoen eta milaka lagunen txalo artean sartu zen. Altzairuzko Oihala erori aurreko urteetan oso gutxi izan ziren Bakearen Lasterketan garaipenen bat lortu zuten mendebaldeko txirrindulariak. Hala, Moral gogoan dute oraindik. Bakearen Lasterketaren 75. urteurrena ospatu dute eta Moral festara gonbidatu dute. Bere bi semeekin joan da, Juanjorekin eta Jorgerekin.
Goiko argazkia: Juan Jose Moral 1975eko Bakearen Lasterketako bigarren etapan, Gerako helmugan. Beheko argazkia: joan zen ostegunean, toki berean.
Festa ostegun arratsaldean izan zen eta Moral bakearen aldeko usoak askatzeko ohorea izan zuenetako bat izan zen. Lehenago, goizean, Gera hirian izan ziren. Bertan, une hunkigarriena bizi izan zuten. Juanjok bertako udalarekin harremana du (duela urte batzuk aitaren argazki batzuk eskatu zizkien) eta Alemaniara joan aurretik berriro beraiekin harremanetan jarri zen. Atletismo estadioa bisitatu nahi zutela esan zien. Alemaniarrek sekulako sorpresa prestatu zieten zumarragarrei. Estadiotik kilometro batera, hamar laguneko taldea zain zuten, duela 50 urteko bizikletekin eta arroparekin. Moral bizikletan sartu zen estadiora, alemaniarrekin batera. Ondoren, estadioari bizpahiru itzuli eman zizkion. Alemaniarrek kazetariei ere deitu zieten eta hurrengo egunean bertako egunkari batean Moralen bisitaren berri eman zuten.
Goiko argazkia: 1975ean, lasterketa irabazi ondoren, bigarren postuan sailkatu zen sobietarrarekin eta hirugarren postuan sailkatu zen txekiarrarekin ohorezko itzulia egiten.
Beheko argazkia: bere bi semeekin, toki berean, ostegunean.
Aita-semeak Berlinen ere egon dira eta gaur itzuliko dira Zumarragara. Sekulako esperientzia izan da. “Aita txundituta dago oraindik. Sinadurak eskatu dizkiote, komunikabideetan atera da… Izan ere, oso lasterketa garrantzitsua zen eta Mendebaldeko Europako txirrindularientzat oso zaila zen irabaztea. Chemnitz hirian ere egon gara. 1975ean aitak bertako Kongress hotelean lo egin zuen eta hotel berean lo egin dugu”, aipatu du Juanjo semeak.
Moral txirrindulari handia izan zen. Bera da Bakearen Lasterketako etapa bat irabazi duen euskal herritar bakarra. Horretaz gain, 1976an Kanadako Montreal hirian egin ziren joko olinpikoetan parte hartu zuen. Gainera, 1971n afizionatu mailako Espainiako txapelketa irabazi zuen, 1974an Montrealen jokatu zen Munduko Txapelketan parte hartu zuen, afizionatu mailako erlojuaren aurkako Espainiako Txapelketa irabazi zuen 1976an… Horretaz gain, afizionatu mailako Italiako Giroan parte hartu zuen eta 1976ko Suitzako Itzulian laugarren postuan sailkatu zen. Irlandako Itzulian bigarren postuan sailkatu zen, Sean Kelly handiaren atzetik. Sekulako errodadorea izan zen, baina zorte txarra izan zuen. 1976an SuperSer taldearekin fitxatu zuen eta bere bizitzako denboraldi onena egin zuen. SupeSer-ek profesional mailako taldea zuen, baina 1976ko Tourrean taldean arazoak izan ziren eta taldea desegin zuten. Agustin Tamamesek bere talde berrirako deitu zion, baina egitasmoa bertan behera gelditu zen. Hala, txirrindularitza uztea erabaki zuen. Moral Burgosko Villamayor de los Montes herrian jaio zen 1951n eta gaztetan Euskal Herrira etorri zen. Eitzan bizi da.
Usoak askatzen, Bakearen Lasterketaren 75. urteurreneko festan.
Alemaniako lagunekin, Gerako estadioko podiumean.
Chemnitz hirian (Alemaniako Errepublika Demokratikoaren garaian, Karl Marx Stadt deitzen zen), Thomas Barth txirrindulari ohi alemaniarrarekin. Barth munduko txapelduna izan zen (taldekako erlojupeko proban) eta berak antolatu du Morali egin dioten omenaldia.
Chemnitz hiriko Kongress hotela (1975ean bertan hartu zuen ostatu).
Morali Kongress hotelaren forma duen likore-ontzia oparitu zioten 1975ean eta oraindik bere etxean du.
Moral, Alemaniako egunkari batean.
Morali buruzko erreportajea, Alemaniako egunkari batean.
