KKinzona irratiak aro berri bati hasiera eman nahi dio eta herritarrei laguntza eskatu die. Horra hor kaleratu duten idatzia:
“Azken urteetan, KKinzonaren eta orokorrean irratigintzaren gainbehera ikusita, aldaketa bat egiteko beharrean aurkitzen gara. KKinzona proiektu kuttunari buruz hausnarketa bat egin genuen azken KKinzona egunean eta bada garaia gaiari serioski heldu eta ekintzetara pasatzeko. Proiektuari bizi berri bat ematea da gure asmoa, KKinzona irratia baino gehiago izan dadin. Twitch, podcastak… hainbat gauza probatzen aritu gara azken boladan, eta horiekin jarraitzeaz gain, irratian bestelako gauzak egiteko aukera aztertzen ari gara: Musika emanaldi txikiak,
hitzaldi, liburu edo bestelakoen aurkezpenak, bideo emanaldiak… Eta hauek denak irrati bidez emititu eta grabatzea da ideia. Irratsaioak egiteko aukera eta baliabideak egongo dira noski, eta orain arteko funtzionamenduak izango du tokia espazio berrian. Hainbat lagunen proposamenak biltzen ari gara eta guztiari forma ematen hasiko gara datozen hilabeteotan.
Guzti hau posible izan dadin zure laguntza behar dugu. Bi aukera daude laguntzeko:
1- Ekarpen ekonomikoa: 20 euroko ekarpena. KaleGorrian kultur elkartearekin elkarlanean azaro eta abenduan ospatuko den Keixpe musika zikloko lau kontzertuetarako sarrerak lortuko dituzu. Kontzertuetan interesik ez baduzu ere, diru ekarpena ongi etorria izango da, kasu honetan gainera zuk nahi duzun kopurua eman dezakezu. Dirua Laboral Kutxako ES07 3035 0027 7902 7004 3363 kontuan sartu behar da zure izen abizenak jarriz. Kontzertu hauetan sarreran bonua zure izenean izango duzu nahi duzunean jasotzeko eta zuretzat gordetzeko.
2- Aktiboki parte hartuz. Irratiko dinamika berriak aurrera eramateko, taldetxoa osatuko dugu. Bai antolakuntza edo burutazio eta proposamenak elkarbanatu eta irratiko agenda osatzeko. Interesa baduzu gugana zuzenean hurbildu edo kkinzonalibrea@gmail.com helbidera idatzi dezakezu”.
