Gorka Hermosak Iparragirreri buruzko ‘Urretxutik mundura’ ikuskizuna eskainiko du bihar Santanderren. Urretxuko Udalak bertara joateko autobusa antolatu du eta bete egin da.
Santanderrek bere tokitxoa du Urretxuko musikaren historian. Zibilak esan naute abestian jaso zuen moduan, Joxe Mari Iparragirre Santander aldera joan zen Tolosako kartzelatik atera zenean. Gorka Hermosa akordeoilari urretxuarra, berriz, Santanderreko kontserbatorioko irakaslea da. Bihar, Iparragirreren jaiotzaren 200. urteurrenean idatzitako Urretxutik mundura obra sinfoniko korala Santanderren taularatuko du. Urretxuar asko joango dira, udalak autobusa antolatu baitu eta bete egin baita.
Kontzertua Palacio de los Festivales de Cantabria aretoan izango da, 19:30ean. Gorka Hermosak (akordeoia), Juanlu Escuderok (aktorea), Marina Pardok (mezzosopranoa) eta Orquesta Sinfonica y Coro de la AFCk (Asociacion Filarmonica de Cantabria) parte hartuko dute, Cesar Vinagreroren zuzendaritzapean. Escuderok, Toti Martinez de Lezeak eta berak Iparragirreri buruz idatzitako estuak errezitatuko ditu.
Autobusa 09:00etan irtengo da Labeaga 14ko geltokitik (Paki eta Josetxo harategiaren parean). 11:00etan Santanderrera iritsiko dira eta urretxuarrek bisita turistiko librea egingo dute. 19:30ean kontzertuaz gozatuko dute. 21:30ean autobusa Urretxu aldera irtengo da. 23:30ean iritsiko dira herrira.
Hermosa oso pozik ageri da. “Larunbata egun historikoa izango da niretzat: Kantabriako (bizi naizen tokiko) auditorio nagusian, orain arte idatzi dudan obrarik handiena interpretatuko dugu (orkestra sinfonikoa, abesbatza, mezzo bakarlaria, akordeoia eta narratzailea). Iparragirreri, Urretxuko bardo unibertsalari, omenaldia izango da. Herri berean jaiotako bi musikari, 200 urteko aldeaz. Hori da obraren leitmotiva”.
Kantabrian euskaraz abesteari ere garrantzi handia ematen dio. Horrek eta urretxuarren erantzunak ekitaldia historikoa bilakatu dutela dio. “50 minutu euskaraz, Kantabriako auditorio nagusian. Gainera, urretxuarrez beteriko autobus bat dator, herriko udalak antolatuta. Uste
dut historikoa dela, bai Kantabriarako eta bai euskal kulturarentzako”.
Kantabriarren erantzuna ere oso ona izaten ari dela gehitu du. “Oso hunkigarria da Kantabria nire kontzertu honi ematen ari zaion erantzuna. Santanderreko auditorio nagusiena ia bete dugu jada. Eta Urretxuren erantzuna ere ezin hunkigarriagoa da”.
Euskal Herria eta Kantabria batzeak ilusio handia egiten dio. “Uste dut meritu apur bat badudala Kantauri itsasora begira dauden bi herri hauek batzen, hizkuntza desberdinak hitz egiten dutenak, bai, baina uste baina gauza amankomun gehiago dituztenak”, azaldu du urretxuarrak.
Urretxutik mundura ikuskizuna Iparragirreren jaiotzaren 200. urteurreneko programaren barne egin zen. Gorka Hermosak Urretxuko Udalaren enkarguz konposatu zuen. Bertan, Iparragirreren melodia ezagunenen moldaketak eta bere obrak fusionatu zituen. Iparragirreren bizitzaren eta obren eta Hermosaren bizitzaren eta obren arteko paralelismoetan oinarritzen da.
Ikuskizuna Donostiako Trinitate plazan estreinatu zen, 2020ko irailaren 12an. Blanchard Strings taldeak, Easo abesbatzak, Jon Maia bertsolariak eta Gontzal Mendibil abeslariak parte hartu zuten.
2021eko ekainaren 20an, berriz, Urretxuko San Martin de Tours elizan egin zuten. Hermosarekin batera punta-puntako artistek parte hartu zuten, Urretxuko akordeoilariak gonbidatuta: Joseba Apaolaza aktore urretxuarrak, Toti Martinez de Lezea idazleak, Jon Maia eta Maialen Akizu bertsolariek, Josu Maroto marrazkilariak, Marina Pardo mezzosopranoak, Blanchard Strings orkestrak eta Easo abesbatzak.
Bihar Santanderren eskainiko duten suite sinfoniko koralaren izenburua Urretxutik mundura da eta izenburua ondo jarria du. Iparragirrek Europan eta Amerikan zehar bidaiatu zuen bere gitarrarekin eta Hermosak mundu osoan zehar.
Maiatzean, hiru bakarlari eta orkestrarentzat egindako lana estreinatuko du Berliner Philarmoniker-en. “Iaz antzeko lan bat estreinatu nuen bertan, motzagoa. Musikari batentzat gauza bakarra dago Berlingo filarmonikan jotzea baino bereziagoa: eduki duen arrakasta ikusita, lan handiago bat idazteko enkargua jasotzea bertan bigarren aldiz jotzeko”. Berlinera joan aurretik, Kuban kontzertu batzuk egingo ditu.
