Urretxuko Udalak II. Aniztasun eta Bizikidetza Plana aurkeztu zuen atzo. Ekitaldian Oihana Merino Aniztasuna eta Bizikidetza arloko dinamizatzaileak eta Maialen Fidalgo zinegotziak parte hartu zuten.
Fidalgok prozesuan parte hartu duten guztiei eskerrak eman zizkien. “Alor ezberdinetako jendeak parte hartu du eta horrek diagnostikoa eta plana aberastu ditu”.
Lehen planak dagoeneko 16 urte zituela gogoratu zuen. “Lehen plana 2008koa da. 16 urte hauetan gizartea eta beharrak asko aldatu dira. Horretara egokitzen saiatu gara. Kulturaren aniztasunetik, aniztasunaren kulturara pasa gara”, aipatu zuen zinegotziak.
Hori esan ondoren, Merinori hitza eman zion. Fidalgok Merino planaren “ama” dela esan zuen. Aniztasuna eta Bizkidetza arloko dinamizatzaileak azken 16 urte hauetan bi gertaera nagusi izan direla gogoratu zuen: kulturaren aniztasunetik aniztasunaren kulturara eman den eboluzioa eta gizartea aldatu den heinean aniztasunaren alde lan egiten duten eragile guztiak ere aldatu egin direla.
Ondoren, plana eratzeko prozesuaren berri eman zuen. Egitasmoan herritarrek parte hartu dute eta guztiei eskerrak eman zizkien beraien proposamenak aurkezteagatik.
Aniztasun guztiak
Merinok aniztasun mota guztiak kontuan izanda lan egin dutela gogoratu zuen: migrazioak eta aniztasun kulturala, gorputz aniztasuna, aniztasun etnikoa, sexu aniztasuna, aniztasun funtzionala eta gainontzekoak. “Pertsona guztiak anitzak gara eta horretan datza gure aberastasunak. Ez da kudeatu behar den arazo bat, baizik eta aberastasuna. Baina pertsona batzuek diskriminazioa pairatzen dute eta guk eskubide urraketarik ez egotea bermatu behar dugu”.
Hala, Aniztasun eta Bizikidetza Planaren oinarrizko hiru printzipioak aniztasuna erdigunean jartzea eta eskubide berdintasuna, diskriminazio eza eta ikuspegi komunitarioa dira. Zeharkako printzipioak ere baditu: euskara, genero ikuspegia eta 2030 Agenda.
Helburu orokorra herritar guztien eskubide berdintasuna, diskriminaziorik eza eta bizikidetza sustatzea da, zeharkatzen dituzten aniztasun ezberdinak edozein direla ere.
Helburu zehatzak
Urretxuko Aniztasun eta Bizikidetza Planaren helburu espezifikoak, berriz, hiru dira: Urretxun bizi den pertsona ororen artean tratu berdintasuna eta diskriminazio eza sustatzea; komunitatean elkar topaketa, hausnarketa, sinergiak eta elkarlanerako espazioak sortzea eta erraztea eta aniztasun guztiei erantzun egokia emateko tresnak eta baliabideak sortzea.
Helburu horiek lortzeko ekintza plan bat garatu dute. Plan horretan bost ekintza jaso dituzte: erreferentzialtasuna indartu, sentsibilizatu, lan bateratua garatu, bizikidetza eraiki eta parte hartzea indartu.
Aniztasunaren eta bizikidetzaren erreferentzialtasuna indartzeko, erreferentziazko espazio fisikoa finkatu dute: Urretxuko Udaleko Aniztasuna eta Bizikidetza arloa kudeatzen duen dinamizatzailea Gizarte Ekimen departamentuan integratu dute.
Sentsibilizazioa
Herritarrak sentsibilizatzeko, sare sozialetako profilak sortu eta kudeatuko dituzte, komunikazio estrategia diseinatu eta kudeatuko dute, agenda zabalduko dute, sentsibilizazioa landuko dute eta urretxuarrei informazioa eskainiko diete.
Herri inklusiboago bat lortzeko, harrera protokoloa garatu eta kudeatuko dute, aniztasun ezberdinen inguruko formakuntza saioak eskainiko dituzte, gertaera konkretuen inguruko aholkularitza zerbitzua eskainiko dute, aniztasun konkretu baten edo gehiagoren inguruko elkarteen sorrera sustatuko dute, banakako orientazioa eskainiko dute eta harrera eskolarekin jarraituko dute.
Horretaz gain, edozein herritarrek komunitatean parte hartzeko dituen baliabideak indartuko dituzte. Horretarako, Aniztasun eta Bizikidetza Mahaiaren dinamikak garatu eta kudeatuko dituzte.
Bestalde, herritarren artean bizikidetza eraikitzeko bitartekoak emango dituzte. Horretarako, dagoeneko martxan dauden ekintzak antolatzen jarraituko dute: Sukaldanitzak, Giza Liburutegia, Aniztasun Jaia, zurrumurruen kontrako hezkuntza proiektua, zurrumurruak desegiteko aisialdi eskaintza, irakurketa errazeko kluba eta film labur zikloa.
Hori guztia aurrera ateratzeaz gain, egindako guztiaren ebaluazioa eta jarraipena egingo dute. Horretarako, barne koordinazioa, Aniztasun eta Bizikidetza Mahaia, ebaluazio adierazleak eta plan osoaren ebaluazioa erabiliko dituzte.
Atzoko ekitaldiak Urretxuko Aniztasuna eta Bizikidetza aroaren irudi berria aurkezteko ere balio izan zuen. Irudia Ibane Cerezo artistak egin du.
Bukatzeko, Fidalgok eta Merinok herritarrak Aniztasun eta Bizikidetza Mahaian parte hartzera gonbidatu zituzten. Informazio gehiago nahi dutenek 693 900 568 telefono zenbakira deitu dezakete edo aniztasuna@urretxu.eus helbide elektronikora idatzi. Urretxuko Udalaren urretxu.eus webgunera ere jo dezakete.
