Jarduera fisikoaren orientazio zerbitzua jarriko dute martxan gaur Zumarragan. Ariketa fisikoa egin nahi dutenek, orientatzaile bat izango dute. Horretaz gain, medikuek orientatzailearengana bideratuko dituzte ariketa fisikoa egiteko premia duten pazienteak. Zerbitzua doakoa da.
ZU Mugituz orientazio zerbitzua Anje Eskarzak eskainiko du. Asteazkenetan, 14:00etatik 16:00etara Gure Txoko gizarte etxean egongo da eta 16:00etatik 18:00etara Ispilla kiroldegian. Ostiraletan, 09:00etatik 11:00etara osasun etxean egongo da eta 11:00etatik 13:00etara El Salvador gizarte etxean. Berarekin harremanetan jarri nahi dutenek aipatutako tokietara jo dezakete aipatutako egun eta orduetan, 663 711 791 telefono zenbakira deitu edo zumugituz@zumarraga.eus helbidera idatzi.
Aurkezpena
Egitasmoa ostiralean aurkeztu zuten Zumarragako Zelai Arizti kultur etxean. Aurkezpenean Mikel Serrano Zumarragako alkateak, Joseba Angulo Kirol teknikariak, Malen Ruiz de Azua Mugimenteko teknikariak, Arantxa Uranga osasun arloko langileak, Aurora Valdivielso Goierri-Urola Garaia ESIko medikuak, Wladimir Carassa Goierri-Urola Garaia ESIko erizain komunitarioak, Maialen Alkorta Athlon kooperatibako kideak eta Eskarzak parte hartu zuten.
Serranok erakunde eta enpresa ezberdinen arteko elkarlana azpimarratu zuen. «Jendeak ariketa fisikoa egitea nahi dugu, betiere bere ahalmenaren arabera». Ruiz de Azuak zorionak eman zizkion udalari, egitasmoarekin bat egiteagatik. «Helburua gizarte aktiboagoa egitea da. Zumarragakoa 50. orientazio zerbitzua da».
Urangak ere udala zoriondu zuen. «Orientazio zerbitzuak emaitza onak ematen ditu eta onura fisiko eta mentala dakar». Carassak beraien helburua jarduera fisikoa egiten ez duten bizilagunen egunerokoa aldatzea dela aipatu zuen. «Gainera, bakardadea pairatzen duten pertsonak eta bazterkeria arriskuan daudenak identifikatuko ditugu». Bukatzeko, Eskarzak jendearen ohiturak aldatzeko lan egingo dutela aurreratu zuen.
