Bidasoa ibaiko larrialdi humanitarioari buruzko 'Faisaien irla' pelikula, asteburuan Zelai Arizti aretoan
Larunbateko 19:30eko saioan Asier Urbieta zuzendariak parte hartuko du
Larunbatean, igandean eta astelehenean, 19:30ean eta 22:00etan, Faisaien irla pelikula emango dute Zumarragako Zelai Arizti aretoan. Larunbateko 19:30eko emanaldian Asier Urbieta zuzendariak parte hartuko du eta solasaldia egingo du ikusleekin.
Pelikulako istorioa Bidasoako mugan gertatzen da. Muga oso garrantzitsua bilakatu da Afrikatik Europara migratzen duten pertsonentzat, hau baita Europa barruan aurkitzen duten lehenengo muga. Europako barne muga bat, mugarik gabeko Europan. Azal kolorearen arabera zeharkatu dezakezuna. Poliziak etorkinei ez die muga pasatzen uzten. Beraz, Frantziara igaro nahi duten pertsona asko uste baino arriskutsuagoa den ibaitik igarotzen saiatzen dira. 2021eko apiriletik hona, bederatzi pertsona hil dira Bidasoako mugan: bost itota, hiru trenak harrapatuta eta bat
urkatuta.
urkatuta.
Pelikula larrialdi humanitario horri buruzkoa da. Faisaien irla munduko kondominio txikiena da. Beraz, burujabetza partekatua dauka. Urte erdia Espaniar Estatuari dagokio eta beste erdia frantsesari. Laida eta Sambou, irla paretik paseatzen doaz, bi pertsona ikusten dituztenean ibaia igerian zeharkatu ezinik. Egun batzuk beranduago, hilotz bat agertzen da irlan, estatu batek besteari burujabetza ematen dion ekitaldian. Ze estatu arduratuko da hilotzarekin? Pelikulako aktoreak Jone Laspiur, Sambou Diaby, Rodony Perriere, Itziar Ituño, Josean Bengoetxea, Jon Olivares, Aia Kruse eta Ximun Fuchs dira.
