Ostegunean, 18:00etan, taldeen aurkezpena egingo dute plazan eta ostiralean, 09:30ean, Itzulia Women plazatik abiatuko da
Itzulia Women lasterketa Zumarragako plazatik abiatuko da ostiralean, 09:30ean. Munduko txirrindulari onenak elkartuko dira, Demi Vollering faboritoa buru. Ostegunean taldeen aurkezpena egingo dute, 18:00etan plazan.
Atzo ibilbidearen eta parte hartzaileen berri eman zuten Antioko interpretazio zentroan. Ekitaldian Goizane Alvarez Kirol diputatuak, Mikel Serrano Zumarragako alkateak eta Javier Riaño Itzulia Womeneko zuzendariak hartu zuten hitza. Ikusleen artean Aitor Galdos izan zen, Laboral Kutxa-Euskadi Fundazioa taldeko zuzendaria. Laboral Kutxa-Euskadi Fundazioa Itzulia Womenen parte hartuko duen Euskal Herriko talde bakarra da.
Aurkezpena Gorka Etxabek gidatu zuen. Etxabe Itzulia Womeneko aurkezlea izango da, Juan Mari Guajardorekin batera. 114 txirrindularik parte hartuko dutela esan zuen, hemeretzi taldetan banatuta. Horietatik hamalau maila gorenekoak dira: World Tour mailakoak. Beste lau Continental mailakoak dira eta beste bat Pro Tour mailakoa (Laboral Kutxa-Euskadi Fundazioa, hain zuzen ere). Goi mailako taldeak iaz baino lau gehiago dira.
Hiru etapen berri ere eman zuen. Zumarragatik abiatuko dena luzeena da. 148 kilometro ditu. Zumarragatik Agurainera (Araba), hiru mendate gaindituko dituzte: Arlaban (3. mailakoa), Opakua (2. mailakoa) eta Azazeta (3. mailakoa). Azazeta helmugatik 24 kilometrora egongo da. Bigarren etapak 116 kilometro ditu: Ugao-Miraballesetik (Bizkaia) Igorrera (Bizkaia) joango dira. Hirugarren etapa Donostian hasi eta amaituko da. Jaizkibel eta Mendizorrotz igoko dituzte. Azken hori helmugatik 10 kilometrora egongo da.
Parte hartzaileei dagokienez, faborito nagusia FDF-Suez talde frantziarreko Demi Vollering herbeheretarra da. Iazko Itzulia berak irabazi zuen eta Vuelta irabazi berri du. Bere arerio gogorrenen artean SD Worx-Protime taldeko Anna Van der Breggen eta Mischa Bredewold herbeheretarrak, Liv-Alula-Jayco taldeko Mavi Garcia espainiarra eta Movistar taldeko Marien Reusser suitzarra izango dira.
Laboral Kutxa-Euskadi Fundazioa taldeari dagokionez, Usoa Ostolaza zarauztarrak eta Ane Santesteban errenteriarrak lan ona egitea espero da. Ostolazak bosgarren egin du Lagunas de Neilan (Burgos) amaitu den Vueltako etapa gogorrean.
Serranok gizonezkoen Itzulia Zumarragan hainbat aldiz egon dela eta emakumezkoena hartzea «ohorea» dela esan zuen. «Txirrindularitzak indar handia du gure artean eta berdintasuna errepideetara eramango dugu. Ikusgarritasuna emango diogu emakumeen kirolari».
Riañok udalari, aldundiei, babesleei, federazioei eta ikusleei eskerrak eman zizkien. «Jendeari txirrindularitza bultzatzen jarraitzeko eskatu nahi diot, kirol honen hazkuntzarekin jarraitu ahal izateko».
Alvarezek antolatzaileei eskerrak eman zizkien. «Anbizio handiarekin lan egiten dute eta bi Itzuliei baliabide berberak eskaintzen dizkiete. Bestalde, Itzulia herrietara ekartzea oso garrantzitsua da. Kirol erreferenteak herrietako neska-mutikoei gerturatzea beharrezkoa da, arrakalarekin amaitzeko. Faboritoen artean bi gipuzkoar daude eta horrek oinarrian oso lan ona egiten dela esan nahi du».
Zumarragari itzulia
ETB1 eta Eurosport telebista kateek lasterketa zuzenean emango dute. EITBren webgunean ere ikusi ahal izango da. Eta goierritarrek bertatik bertara ikusi ahal izango dituzte txirrindulariak. Taldeen autobusak Urdaneta eta Artiz kaleetan egongo dira. Bihar, 18:00etan, taldeen aurkezpena egingo dute plazan. Etzi goizean, lasterketa abiatu aurretik, txirrindulariek Zumarragari itzulia emango diote. Ondoren, 09:30ean, lasterketa abiatuko da. Plazatik geltokira joango dira eta handik Legazpi aldera.
Lasterketak trafikoan eragina izango du. Bihar, 12:00etatik aurrera ezin izango da Artiz kalean aparkatu eta 22:00etatik aurrera ezta Urdanetan eta Ibaiondon ere. Ostiralean, 09:00etatik aurrera, Jai Alai, Legazpi eta Secundino Esnaola itxita egongo dira.
