Zumarragako goiko auzoetan hainbat ekitaldi antolatu dituzte bizilagunen arteko hartu-emana sustatzeko
Zumarragako goiko auzoetan Auzoa disfrutatu ekimena antolatu dute bizilagunen arteko hartu-emana sustatzeko. Lehen ekitaldia hilaren 21ean izango da eta azkenak ekainaren 1ean. Maiatzaren 31n herri bazkaria egingo dute.
Ekitaldien helburu nagusia Leturiatarren plaza, Argixao, Izazpi, Antonino Oraa, Elgarrestamendi, Busca Isusi eta Ipar Haizeako bizilagunek elkar ezagutzea eta auzo sentimendua indartzea da, baina Zumarraga eta Urretxuko gainontzeko bizilagunek ere parte har dezakete. Egitasmoak ATA harategiaren, Booloo etorkin senegaldarren elkartearen, Alhijra Meskita Elkartearen, Gure-Txoko eta El Salvador gizarte zentroen, Mairi elkartearen, AGIren (ikusmen urria dutenen elkartea), Esku Hutsik elkartearen eta Jolasenea elkartearen laguntza du.
Datorren asteazkenean (maiatzak 21), 17:00etan, psikomotrizitate saio irekia egingo dute Izazpi auzoko kantxa estalian. Hilaren 24an, 18:00etan, dantza eta sevillana erakustaldia egingo dute El Salvador zentroan. 25ean, 18:00etan, El Salvador elkarteak dantzaldia dinamizatuko du Izazpi auzoko kantxan.
Jai egun nagusia hilaren 31 izango da. Ekitaldi guztiak Izazpi auzoko kantxa estalian izango dira. 11:00etatik 13:30era belaunaldi ezberdinetako bizilagunek eskulanak egingo dituzte elkarrekin. Ondoren, herri bazkaria egingo dute: auzoko bizilagunek arroza prestatuko dute, bakoitzak bere jatorrizko herrialdean egiten den moduan. Bazkarian nahi duten guztiek parte har dezakete. 300 tiket banatuko dira, doan, Zelai Arizti kultur etxean, El Salvador zentroan eta Alhijra meskitan. Tiketak maiatzaren 28ra arte banatuko dira. Bazkalostean, 15:30ean, bingoan jokatuko dute. Irabazleek ATA harategiak emandako loteak jasoko dituzte. 16:30etik 18:30era Senegalgo dantzak egingo dituzte, Sapali perkusio taldearekin.
Azken ekintzak ekainaren 1ean izango dira. 11:00etatik 14:00etara mahai-jokoetan aritzeko aukera izango da eta 18:30ean Mi amigo el pinguino pelikula emango dute.
Egitasmoa atzo aurkeztu zuten, Leturiatarren plazan. Bizilagunek, Mikel Serrano alkateak eta Arantxa Gonzalez zinegotziak parte hartu zuten. Serranok egitasmoa auzoetako parte hartze prozesuaren ondorioz antolatu dela esan zuen. “Eskerrak eman nahi dizkiet parte hartu duten guztiei. Bakardadea eta ekintza falta sumatu ziren eta egitasmo hau martxan jarri dugu bizilagunen inklusioa sustatzeko, auzoaren identitatea indartzeko eta aniztasunaren balioa aldarrikatzeko. Zumarraga herri anitza izan da beti”.
Gonzalezek ere eskerrak eman zizkien parte hartu zuten guztiei. “Egitarau hau elkarrekin lan eginez lor daitekeenaren erakusle da. Eta hau hasiera besterik ez da. Herritar guztiak ekitaldietan parte hartzera animatu nahi ditut”. Alkateak garai honetan auzoko jaiak ospatzen zirela gogoratu zuen eta Auzoa disfrutatu urtero antolatuko dela aurreratu zuen.
