Gaur arratsaldean Zumarragako olinpiadak aurkeztu dituzte Zelai Arizti aretoan. Ekitaldian, parte hartuko duten taldeetako ordezkariek, antolatzaileek (Kirolzale) eta Mikel Serrano Zumarragako alkateak parte hartu dute. Ia 200 lagunek parte hartuko dute olinpiadan, 16 taldetan banatuta. Finala ekainaren 27an jokatuko da eta Santa Isabel jaiei hasiera emango dio.
Kirolzalek antolatutako ekitaldi berritzaile eta parte hartzaile hau datorren larunbatean (maiatzak 24) hasiko da. 8-12 lagunez osatutako 16 taldek parte hartuko dute. 187 bizilagunek, guztira. Garaileak 1.000 euroko bonua jasoko du, Zumarragako dendetan gastatzeko. Ekimena babesten duten babesleei esker, beste hamaika sari banatuko dira. Talde bakoitzak babesle bat du: Eurre – Xaloa taberna, No Limits – Abenida taberna, LGG – Etxarre Inmobiliaria, RMF – Aitube Berri, AH – Bi-Tartean elkartea, Empotro Armanti – Ata Harategia, Earki Gatxik – Aldapa Street Food, KMPL – Janeiro Iturgintza, EMTF – Faka Gipuzkoako Energia, Anticorruptos FC – Garbiketak Zumarraga, BPG – Zuzen Zerbitzu Grafikoak, LK – Txindoki, Manchester Pitis – Saski taberna, 11 y la jefa!!! – Salto Training, Militancia X – Urzubi taberna eta APV – Iñaki Gastro.
Olinpiada hiru fasetan egingo da: lehen fasea, finalerdiak eta finala. Lehen fasea maiatzaren 24tik ekainaren 15era bitartean jokatuko da, larunbat eta igandetan eta taldeak bost kirol desberdinetan lehiatuko dira: futbol 5, frontenis, saskibaloia, boleibola eta igeriketa.
Izena eman duten taldeak 16 izan direnez, lehen fase honetan hiru taldeko hiru multzo eta lauko batean banatu dira. Herri olinpiada herri guztira heldu dadin, proba bakoitza Zumarragako gune batean jokatuko da: La Salle-Legazpiko patioan, Beloki pilotalekuan, geltokian, Izazpiko kantxa estalian, Ispilla kiroldegian eta Zumarragako plazan.
Lehen fase honetako zortzi talderik onenak finalerdietara sailkatuko dira. Bigarren fase hau egun bakarrean jokatuko da, ekainaren 21ean, Zumarragako plazan. Egun horretan egin beharreko lanak lehen fasea amaitutakoan emango dira jakitera. Lau talde onenek finala jokatuko dute, ekainaren 27an. Kasu horretan ere, finalean egin beharreko lanak finalerdiak jokatutakoan emango dira jakitera.
