EH Bilduk autobusa Legazpitik abiatzea eskatzen duen urgentziazko mozioa aurkeztu du, baina ez da urgentzia onartu
Azkenaldian ez dago eztabaidarik gabeko osoko bilkurarik Zumarragan. Apirilaren amaierakoan diru kontuei eta Metal 78 enpresaren egitasmoari buruz eztabaidatu zuten, eta asteartean, berriz, Goierri eta Donostia lotzen dituen autobus zerbitzu berriaren inguruan. EH Bilduk autobusa Legazpitik irtetea eskatzen duen mozioa aurkeztu zuen urgentziaz, galdera-erantzunen tartean, eta PSE-EEk eta EAJk urgentziaren aurka bozkatu zuten. Bozketaren aurretik sutsuki eztabaidatu zuten mozioaz, urgentziaz, batzuen eta besteen jarreraz… baita Abiadura Handiko Trenaz ere.
EH Bilduko Aritz Elgarrestak mozioaren urgentzia justifikatu zuen. «Gaia zerbitzua egonkortu aurretik lantzea komeni da», esan zuen. Horretaz gain, alkateak mozioa osoko bilkurara eraman ez izana kritikatu zuen. «Gure ekimen politikoa aldebakartasunez mugatu al daitekeen da gaurko debatea. Mozioa joan zen asteazkenean erregistratu genuen eta ostiralean alkateak mozioa ez zela plenora joango jakinarazi zigun. Ekaineko osoko bilkuran eztabaidatuko dela. Hori dela eta, urgentziaz aurkeztu dugu, gaur eztabaidatu dadin. Hala egingo ez bagenu, alkateak erabakiak aldebakartasunez hartzea normalizatuko genuke. Hori ez da gure gobernu eredua. Agintekeria da. EAJk, urgentziari baiezkoa ematen ez badio, hori legitimatuko du».
Serranok gaia eztabaidatu aurretik zerbitzuari buruzko datuak jaso behar direla esan zuen. «Nire erabakia arriskutsua dela diozue, baina hasieratik dakizu mozioa ekainean eztabaidatuko dela. 17 urtetan ez dut erabaki bakar bat aldebakartasunez hartu. Ez diot inori hitza kendu eta ez dut inoiz mozio bat eztabaidatzea eragotzi. Mozioa zerbitzuari buruzko datuak eskuartean ditugunean landuko dugu. Horregatik eta ez diolako Zumarragari zuzenean eragiten atzeratu dut ekainera. Ez da urgentziaz landu beharreko gaia. Zerbitzua aldundiak jarri du martxan, herritarren eskaerari erantzuna emanez. 2011n, zuek aldundian izan zinetenean, eskaera egina zegoen. Eta ez zenuten zerbitzua martxan jarri. Martxan jarri da, azkenean, eta ez dela nahikoa diozue».
Autobusa Zumarragatik abiatzea logikoa dela gehitu zuen. «Zergatik ateratzen den Zumarragatik? Geltoki intermodal bakarra Zumarragan dagoelako. Aldundia lan ona egiten ari da. Autobus maiztasun handia dago eta irteera ordu laurden atzeratu da Legazpitik datozenak garaiz hel daitezen. Komunikabideetara bidali zenuten oharrean ez zenuten hori aipatu. Gainera, aldundiak legazpiarrek bigarren aldaketa [Donostian, Lurraldebusetik Dbusera] ez ordaintzeko ahalegina egin behar du. Ekainean datu gehiago izango ditugu».
Ezkio-Itsaso
EH Bilduren jarrera kritikatu zuen. «Lehenengo mozioa erregistratu zenuten eta ondoren mozioaren berri eman zeniguten. Horiek dira zuen moduak. Bestalde, unibertsitatera joaten diren Ezkio-Itsasoko bizilagunek ez al dute eskubiderik? Gai hau Urola Garaikoa dela gogoratu duzue, baina ez duzue Ezkio-Itsaso aipatu. Mankomunitatean AHTaren lotura Ezkion egiteari buruzko iritzi bateratua ematea eskatu genuenean, gustura hartuko genuen gaur azaldu duzuen jarrera. Baina orduan txosten teknikoak eskuartean izatera itxaron behar zela esan zenuten. Orduan bai, gaur ez. Mozioak ez du zerikusirik Zumarragaren interesekin».
EAJk ere mozioa lantzea ez zela urgentea esan zuen. «Zerbitzua martxan ez balego, komenigarria izango litzateke mozioa urgentziaz eztabaidatzea. Baina zerbitzua martxan dago. Hori dela eta, ez dugu ulertzen zertara datorren urgentziarena. Bestalde, mozioa gurekin kontsultatu gabe erregistratu zenuten. Adostasuna lortzeko aukera galdu da, ez dakit nahita edo nahi gabe. Orain, gaia ekainean landuko denez, adostasuna lortzeko aukera dugu. Urgentziaren aurka bozkatuko dugu, baina eskaera zentzuzkoa eta aztertu beharrekoa dela uste dugu», esan zuen Josu Idigorasek.
PSE-EEko Iñaki Mendiluzek ere hitza hartu zuen. «Urgentziaren aurka bozkatzen badugu, alkatearen txotxongiloak garela diozue. Errespetua eskatzen dizuet. Etxera lasai joango naiz: alkateak mozioa demokratikoki atzeratu du, bere eskumenen artean baitago, eta nik neure kontzientziak agintzen didanaren arabera emango dut botoa».
Elgarrestak gaiak legazpiarrei asko eragiten diela gogoratu zuen. «Guk gurea eta besteei zer gertatzen zaien berdin al dio? Mankomunitateko gaia da. Egia da geltoki intermodal bakarra Zumarragan dagoela, baina Antzuolakoek eta Bergarakoek berdin-berdin hartu dezakete Donostiako autobusa, hau Legazpitik abiatu edo Zumarragatik abiatu. Legazpiarrek bigarren autobus-aldaketa ordaindu behar dute eta hori konpontzeko modu errazena autobusa Legazpitik abiatzea da. Ezkio-Itsaso ahaztu dugula diozu, baina autobusa bertatik pasako balitz ibilbidea luzatu egingo litzateke eta horrek zumarragarrei eragingo lieke. Autobusa Legazpitik abiatzeak, ordea, ez die zumarragarrei eragiten».
AHT
Trenari buruzko iritzia ere eman zuen. «AHTari dagokionez, gure iritzia argia da. Zuena, ez horrenbeste. Zuri galdetu edo Eneko Anduezari galdetu… Ez dugu ulertzen gai honek nola sor dezakeen horrelako eztabaida».
Serranok ere ez zuela ulertzen esan zuen. «Benetako egoera zein den ez dakien batek legazpiarrak diskriminatuta daudela pentsa dezake. Ordiziako alkatea zuen alderdikoa da eta zerbitzuaren aurkezpenean egon zen. Ez zion ezer esan diputatuari legazpiarrei buruz. Gaur egiten ari zaretena antzezpen bat da. Urola Garaiko gaia bada, zergatik ez duzue mankomunitatean aurkeztu? Legazpik badu zerbitzua eta Ezkio-Itsaso ere eskualdekoa da!».
