Jon Zalduak eta Yulen Aranberrik bigarren mailako euskal duatloi txapelketan parte hartuko dute larunbatean
Zaldua parte hartzaile gazteena izango da, 16 urterekin
Jon Zaldua, gazte mailako euskal pentatloi txapelketan. Yulen Aranberri eta Jon Zaldua zumarragarrek bigarren mailako euskal duatloi txapelketan parte hartuko dute larunbat honetan. Lehiaketa Azpeitiko zezen plazan izango da, 18:00etan.
19 kirolarik parte hartuko dute eta Zaldua guztien artean gazteena izango da, 16 urterekin.
Kirolariek sei lan egingo dituzte: etzanda egongo den 45 ontzako egurra ebaki, zutik egongo den 45 ontzako egurra ebaki eta 500 metro egin korrika (bost itzuli plazari), bi aldiz segidan. Lanak 15 minututan amaitzen ez dituztenek, kanporatuak izango dira. Zalduak lehen txandan parte hartuko du Aritz Oregi eta Eneko Larrionekin eta Aranberrik bigarren txandan, Emilio Garcia, Iosu Santamaria eta Manuel Frailerekin.
Lehen sei sailkatuek lehen mailako txapelketan parte hartuko dute, ekainaren 8an Azpeitiko zezen plazan. Bertan, lehen mailako sei kirolariekin arituko dira: Ugaitz Mugertza, Ibai Soroa, Arkaitz Jauregi, Oier Kañamares, Julen Kañamares eta Xabier Zaldua.
Bigarren mailako txapelketako sarrerak salgai daude jada, 20 euroan, Azpeitiko Mendizabal erretegian. Egunean bertan ere erosi ahal izango dira, zezen plazako leihatilan. Zezen plazako ateak 17:00etan irekiko dira. Ordu horretan egurren zozketa egingo da. 18:00etan aurkezpena egingo da, 18:05ean lehen txanda jokatuko da, 18:20ean bigarrena, 18:40ean hirugarrena, 19:00etan laugarrena eta 19:20ean bosgarrena. Sari banaketa ekitaldia 19:45ean izango da.
Yulen Aranberri, Lazkaoko jaietan.
Jon Zaldua, ezkerretik lehena, bigarren mailako euskal duatloi txapelketaren aurkezpenean.
