Bengoleako aktibitate ekonomikoen artikuluari alimentazio zentroa gehitzeak kontsentsua apurtzen duela salatu du Urretxuko EH Bilduk
Urretxuko EH Bilduk udal gobernuak Hiria Antolatzeko Plan Orokorraren (HAPO) aldaketa egiteko erabilitako aldebakartasuna deitoratu du. Horra hor komunikabideetara igorri duten prentsa oharra.
“Bengolea 17.1 azpieremua moduan ezagutzen den lurzoruan HAPOak baimentzen dituen aktibitate ekonomikoen inguruko aldaketa partziala egin da osoko bilkuran. Aldaketa hori, ordea, herrian zein eragin ekonomiko izan dezakeen aztertu gabe, eta Bi-Tartean eta Dendartean elkarteekin bildu gabe bozkatu da. 2021ean, udalbatzak HAPOa onartze prozesua abian jarri zuenean, argi eta garbi zehaztu zen, alderdi guztien adostasunarekin, Urretxuren hegoaldean dauden eremu horietan guztietan zein aktibitate ekonomiko-industrial ezarriko ziren. Bestetik, 2012ko abenduaren 27an, udalbatzaren gehiengo osoz, Dendarteanekin, Gipuzkoako merkatari elkarteen partzuergoarekin, hitzarmen bat sinatu zen. Hitzarmen horretan ere argi eta garbi ageri da zer egin daitekeen eta zer ez. Bengoleari dagokion gune industrialean gaur gaurkoz baimentzen diren aktibitate ekonomikoen artikuluari alimentazio zentro gehikuntza txertatzeak Urretxuko hegoaldearen garapenaren inguruko kontsentsua apurtzen du, kontuan izanik urteetan eta hamarkadetan inguru hartan guztian egon diren proiektu eta egitasmoek sortutako eztabaidak gainditutzat eman genituela. Gainera, gaiak duen traszendentzia maila kontuan hartuta, zer etor litekeen jakin gabe bozkatu dugu, horrek hemendik urte batzuetara izan ditzazken ondorioekin. Izan ere, aldaketa lurzoruaren jabeak egindako eskari batetik dator, baina benetako proiektu errealik mahai gainean egon gabe. Hori horrela, aldaketa honi ezezkoa eman diogu. Uste dugu HAPOaren aldaketa bat egiteko informazio gehiago behar dela eskuartean. Zer proiektu joango den jakin gabe aldaketa bat egiteak interes partidistari soilik erantzuten dio. Jakinda, gainera, udalbatzaren gehiengo osoak azken urteetan hartutako erabakiari kontra egiten diola. Azkenik, Bi-Tartean zein Dendartean elkarteek aldaketa horren berri ez izateak aldebakartasunari soilik erantzuten dio, eta herriaren garapenerako hain garrantzizkoak diren erabakiak ahalik eta adostasun handienak lortuta etorri beharko lukete, 2021ean egin genuen moduan”.
