Urretxuko Udalak San Joan jaien inguruko hainbat ohar igorri ditu. San Joan bezperako dantzarekin, San Joan eguneko bazkariarekin eta trafikoarekin lotutakoak, hain zuzen ere.
San Joan suaren inguruan dantzatzeko entseguak honako egun eta orduetan izango dira: ekainak 17 (asteartea) eta 19 (osteguna), Gainzuri ikastetxeko arkupeetan, 20:00etan.
Santa Barbaran jarriko den karpan bazkaltzeko txartelak Aizpurunea kultur etxean eta Santa Barbara jatetxean eros daitezke ekainaren 18ra arte edo lekuak agortu arte. Helduentzako menuak 28 euro euro balio du (itsaskiz betetako piperrak, penka onddo-saltsarekin, sahieskia, goxua, kafea, kopa, ogia, ura, ardoa eta sagardoa) eta haurrenak (12 urtetik behera) 13 euro (makarroiak, oilasko bularkia patata frijituekin, Danonino, ogia, ura eta freskagarriak).
Harrizko mahaiei dagokienez, zozketa ekainaren 11an izango da eta izen ematea zabalik izango da ekainaren 2tik 10a arte kultur etxean.
San Joan Eguneko ospakizunerako, Santa Barbaran mugatuta egongo da ibilgailuen sarrera. Emango diren baimenak errepidean aparkatzeko izango dira. Baimen bereziak eskainiko dizkiete bertara materiala igo behar duten kuadrillei. Kuadrilla bakoitzeko bi baimen emango dira. Santa Barbara aldean bizi diren baserritarrei ere emango zaie. Baimena eskatzeko aurkeztu behar diren datuak hauek dira: izen-abizenak, telefono zenbaki bat (mugikorra ahal baldin bada), eta baimenduko diren kotxeen marka eta matrikula zenbakiak.
Baimenak Urretxuko Udaltzaingoaren bulegoan eskatu daitezke, ekainaren 12tik 20ra, astelehenetik ostiralera 07:00etatik 21:00etara eta larunbatetan eta igandetan 09:00etatik 21:00etara.
Santa Barbarara igotzeko Pagoeta auzoko errepidea bakarrik erabili ahal izango da. Nekolalde/Mundo Mejor/Basagastitik Santa Barbarara joateko bidea moztuta egongo da eta baimenik ez dutenek, Erratzu poligonora bakarrik igo ahal izango dute. Nekolaldetik Santa Barbarara joateko bidea moztu egingo da eta jaisteko bakarrik erabiliko da. Hala ere, Nekolaldetik Etxaburura igotzeko aukera egongo da.
Urretxuko Udalak herritarrak autobusa erabiltzera animatzen ditu. Doako zerbitzua da, denentzako irisgarria eta erosoa. Autobusa gelditu gabe ibiliko da, 10:00etatik 20:30ak arte. Geltokia Labeaga kalea 14an egongo da (Jose Mari Lasa plaza).
