Klima aldaketari buruzko erakusketa egingo dute, gaur Urretxuko azokan eta larunbatean Zumarragakoan
Klima aldaketa hemen da eta aurre egiteko, gutxiago kontsumitzeaz gain, bere ondorioetara egokitu beharra dago. Urola Garaia mankomunitateak klima aldaketaren inguruan egin dituen lanaketak eta martxan jarri dituen ekimenen berri eman du. Ekitaldian Jon Luqui mankomunitateko lehendakari eta Urretxuko alkateak, Joseba Telleria Ezkio-Itsasoko alkateak, Nerea Errasti Zumarragako zinegotziak eta Oscar Valbuena Legazpiko zinegotziak parte hartu dute.
Ekitaldia atzo (asteartea) izan zen, Sortzen eraikinean. Luquik Jasangarritasun Energetikoaren eta Klimatikoaren Plana aurkeztu zuen, Oscar Valbuenak Eskolako Agenda 2030eko parte hartzaileek egindako proposamenen berri eman zuen, Telleriak babesleku klimatikoen inguruko lanketa aurkeztu zuen eta Errastik sentsibilizazio kanpaina aurkeztu zuen.
Luquik 2016an Energia Plana abian jarri zutela eta ondoren klimaren aldagaia barneratu zutela gogoratu zuen. «Jasangarritasun Energetikoaren eta Klimatikoaren Plana prestatu dugu eta administrazio kontseiluan onartu dugu. Uggasa garapen agentzia eta udalak Gipuzkoako Foru Aldundiko Jasangarritasun departamentuarekin, UGLErekin eta ikastetxeekin elkarlanean gabiltza, gizarte guztia egungo energia ereduaren aldaketan eta klima aldaketaren aurkako borrokan inplikatzeko».
Legedia
Planak abiapuntua eta joera ezagutzeko eta arriskuen ebaluazioa egiteko balio du. Baita klima aldaketaren eragina arintzeko eta klima aldaketara egokitzeko ere. Horretaz gain, energia eta klima legedia betetzen laguntzeko balio du. Trantsizio Energetikoari eta Klima Aldaketari buruzko legeak berotegi efektuko gasak %50 murriztu behar direla, kontsumo energetikoa %32 murriztu behar dela eta kontsumo energetikoaren %32 berriztagarria izan behar dela dio. «Urola Garaian garbi dugu zer lortu nahi dugun, arintzeko eta egokitzeko planak adosten ari gara, parte hartze prozesuak irekiko ditugu eta neurriak hartzen jarraituko dugu», esan zuen Luquik.
Erreminta horietako bat Eskolako Agenda 2030 da. Parte hartzen duten zazpi ikastetxeetan klima aldaketa, aterpe klimatikoak eta horiek osasunean eta ongizatean duten eragina landu dituzte. Diagnostikoa egin dute eta mankomunitateko herriak nola ari diren prestatzen aztertu dute: herriko jolas guneen egoera zein den, herriguneetan klima aldaketa nabaritzen hasi ote den, baserritarrek zer dioten, aterpe posibleak zeintzuk diren, helduenek zer dioten…
Joan zen asteartean egindako lanaren berri eman zieten alkate eta zinegotziei. Parkeak estaltzea, herriguneetan berdegune gehiago egitea eta tokiko elikadura sistemak indartzea proposatu dute. Horretaz gain aterpe klimatiko izan daitezkeen eraikinak eta guneak identifikatu dituzte eta zerrendatu ondoren mapa batean kokatu dituzte. Herritarren artean inkesta bat egin ondoren, klima aldaketa eta aterpe klimatikoen inguruan ezjakintasun handia dagoela ikusi dute. Hala, informazio eta kontzientziazio kanpainak egitea proposatu dute. «Eskualdeko hezkuntza komunitatea zoriondu nahi dut, egin duen lanagatik. Lan hori kontuan hartuko dugu», esan zuen Valbuenak.
Aholkularitza enpresa
Hala, Telleriak aholkularitza enpresa baten laguntzarekin ikasleen proposamenak aurrera ateratzen saiatuko direla aurreratu zuen. Lana fase ezberdinetan banatuko dute. Lehenik, babesleku klimatiko izateko bete beharreko irizpide eta baldintzak bilduko dituzte. Ondoren, herri bakoitzak eskaini dezakeena finkatuko du: kokapena, ordutegiak eta zerbitzuak.
Zerrenda eta baldintzak onartu ondoren, herritarrei horren berri emango diete. Horretarako, logo bat diseinatuko dute, aterpe klimatikoei buruzko eskuorri bat argitaratuko dute bakoitzaren berezitasunekin eta kalean panelak jarriko dituzte. Panel horietan, eskuorrietako informazioaz gain, larrialdi egoeretan nora jo azalduko dute.
Aste Berdea
Herritarren konpromisoa ezinbestekoa denez, Aste Berdean aldaketa klimatikoak zer dakarren eta nola aurre egin azalduko dute. Errasti izan zen Aste Berdearen berri eman zuena. «Aurreko urteetan bezala, Eskolako Agenda 2030en landu den gaia herritarrengana zabaltzeko Europako Aste Berdearekin bat egin dugu. Klima aldaketa ezagutarazteko eta hausnarketa bultzatzeko, erakusketa interesgarri bat prestatu dugu».
Erakusketaren izenburua Klima aldaketaren aurkako beste borroka: egokitzapena da. «Trantsizio Ekologikorako ministerioak utzi eta guk euskarara itzulitako 10 panelek osatzen dute. Honako gaiak azaltzen dira: zer alde dagoen eguraldiaren eta klimaren artean, zer egin dezakegun klima aldaketaren ondorioak arintzeko eta zer dagoeneko gainean dugunera egokitzeko…».
Tokiak eta orduak
Erakusketa ibiltaria da. Ekainaren 5ean Urretxuko Gernikak Arbola plazan egongo da (11:00etatik 13:00etara), ekainaren 6an Legazpiko Euskal Herria plazan (11:00etatik 13:00etara), ekainaren 7an Zumarragako Euskadi plazan (11:00etatik 13:00etara) eta ekainaren 8an Ezkio-Itsasoko Etxeberrialde kalean (10:30etik 12:30era). Erakusketara gerturatzen direnek udako beroari aurre egiten lagunduko dien oparitxo bat jasoko dute.
