Urretxuko EH Bilduk Pagoeta gune soziokulturalaren erabilera zehazteko proposamena aurkeztu du. Txostenak espazioak izan beharko lukeen filosofia eta bere helburuak jasotzen ditu. Baita Pagoeta kudeatzeko ereduaren inguruko eztabaida proposatu ere.
Apirilean txostena udal gobernuari pasa zioten eta asteazkenean komunikabideei aurkeztu zioten, EH Bilduren egoitzan. Ekitaldian txostenaren lanketan parte hartu duten kideek parte hartu zuten. Jon Altolagirre zinegotziak hartu zuen hitza. «Pagoeta guneak aukera paregabea irekitzen digu herriko dinamika kulturalari elikatze prozesua eskaintzeko eta kultur ekintzetarako espazio osagarri bat eraikitzeko. Espazio horri bere potentzialitate osoa ateratzeko eragile kulturalen, auzotarren eta, oro har, herritar guztien ahotsa entzutea behar beharrezkoa da».
Urretxuko Udala orain arte baino anbiziotsuagoa izan behar dela uste dute. «Anbiziotsuagoak izatea dagokigu, herriaren dinamika soziala eta kulturala aberastu dezakeen dinamizazioa aurrera eramateko, espazioa egituratzeko eta erabilera handitzeko. Egun, inongo eduki eta koordinazio teknikorik gabe eta eskaeraren arabera erabiltzen da. Era koordinatu batean eta profesionaltasunez, kultura bizitzeko eta esperimentatzeko espazioa izatea proposatzen dugu».
Eskualdean erreferente
Pagoeta gune soziokulturala eskualdean erreferente izatea nahi dute. «Espazio berritzaile bat, kultura eta herritarren parte hartzea oinarri izango dituena, eta modu kooperatibo batean elkarte zein norbanakoekin lan egingo duena. Gaur egun Urretxuk duen kultur agenda aberastu eta orain arte egin ezin izan diren ekintzak ahalbideratzea posible egingo duena. Aukera bikaina daukagu Pagoetarekin Urretxu eskualdeko kultur topagune bilakatzeko», esan zuen Altolagirrek.
Inguruan integratzea ere garrantzitsutzat jo dute. «Ikastolak, Aspacek eta herriko elkarteek zein norbanakoek izan ditzaketen beharrei erantzun ahal die eta Pagoeta auzoko ekosistemari erantzuteko gaitasuna izan dezake. Pagoeta auzoa biziberritzeko aukera eman diezaguke».
Hori guztia, eragile kulturalen eta herritarren parte hartzearekin. «Egitasmoa zehaztea eta herriko eragile soziokulturalen inplikazioa, esfortzua eta sormen gaitasuna erakartzea eta koordinatzea ezinbestekoa da. Hori dela eta, eragile horiek guztiek egitasmoaren definizioan presente egotea funtsezkoa da».
Azkenik, kudeaketaren inguruan mintzatu zen. «Espazio eta proiektua koordinatuko dituen teknikari edo profesional talde bat sortzearen beharra ikusten dugu, udalarekin elkarlanean arituko dena. Forma ezberdinak har ditzake egituraketa horrek: udal teknikarien taldea sendotu eta autonomia eman, entitate bat sortu (kooperatiba, fundazioa…)… Helburua gunea behar bezala kudeatzea eta kultur espazio aitzindari bat egitea bada, berau koordinatuko, elikatuko eta dinamizatuko duen talde bat beharrezkoa da».
Proiektua definitzeko parte hartze prozesu bat beharrezkoa dela uste dute. Hori dela eta, dinamika posible bat aurkeztu diote udal gobernuari. «Gure proposamenak ez dio aterik ixten Pagoetako espazioaren erabilera definitzeko beste proposamenei. Datorren asteetan eragile ezberdinekin erronda bat abiatuko dugu, gure proposamena aurkeztu eta ekarpenak jasotzeko».
