Gipuzkoako Foru Aldundiak gaur egin duten agerraldian parte hartzekoa zen Adur Ezenarro Ordiziako alkatea, baina atzo bertan jakinarazi zuen azkenean ez zuela parte hartuko, eta bere balorazio propioa kaleratu zuen atzo arratsaldean.
“Apirilaren 28an zerbitzua martxan hasi eta berehala doitu behar izan zituzten Zumarragako autobusen ordutegiak planteamenduan sartzen ez zen Legazpiko lotura bermatzeko, autobus-aldaketa bitartez. Baina horrekin, Legazpiko bizilagunei, Zumarragakoei, Beasaingoei eta Ordiziakoei ez bezala, zigorra ezarri zaie, dBus-en zerbitzuetan doako autobus-aldaketa egiteko aukera kendu baitiete”, nabarmendu du EH Bilduren oharrak.
“GO07 linea berria Legazpitik hasi ez izanaren arrazoia ez da teknikoa, politikoa baizik. Legazpi linea berri horretatik kanpo uzteko erabaki politikoa hartu zutenek ez zekiten, edo ez zuten kontuan hartu nahi izan, Mugi sisteman doako autobus-aldaketa bakarra egin daitekeela”.
Doako garraio-aldaketa horrekin ere legazpiarrei “gauza gutxi konpondu” zaiela azaldu du koalizioak. “Zumarragatik Legazpira bueltatzeko hartu behar duten Lurraldebuseko DG04 lineako autobusak sarri atzerapenarekin iristen dira… autobusek duten mantentze lan eskasa dela-eta. Ondorioz, Legazpira berandu iristen dira, eta, horregatik, erabiltzaileek ezin izaten dute Zumarragan aldaketa egin. Esango dute aldaketa bermatua dagoela, baina ez da kalitatea bermatzen, ez delako azkar egiten, besteak beste”.
Bestetik, EH Bilduko kritikatu du planteamendua egiterakoan ez direla aintzat hartu eskualdean dauden gainerako zerbitzuak, eta horregatik, “kasurik gehienetan” ez dira bateragarriak. “Beraz, ez da behar bezala sustatzen eta bermatzen garraio publikoaren erabilera”.
“Inprobisazioz betetako prozesua”
Goierri Donostiarekin autobus zerbitzu bidez lotzeko prozesua “inprobisazioz betetakoa” dela adierazi du EH Bildu. “Prozesu honetan hartu duten azken erabakiarekin ere ez da behar bezalako zerbitzua bermatzen; izan ere, lanegunetan, goizeko lehen bi autobus zein Donostiako bueltako gaueko azken biak gelditzen dira Legazpin. Eta, asteburuetan, eguneko lehenengoa eta Donostiako bueltako azkena. Bi autobus horiek Legazpin dute gordetzeko tokia; beraz, goizean irteten direnean bakarrik har daiteke autobusa Legazpin, gainontzeko orduetan ez, autobus-aldaketa egin behar dute”.
Goierritik Donostialdera egunero egiten diren joan-etorriei erantzungo dieten “zerbitzuak indartu” behar direla dio oharrak, “bereziki lan edo ikasketa arrazoiak direla medio errutina finkoetan oinarritzen direnei”. Halaber, beste garraio-zerbitzu batzuen erabilera ere erraztu beharko lituzkeela azaldu du, “hala nola Eusko Trenena, eta Donostiako Miramongo Parke Teknologikoa zein ospitale-gunerako sarbidea hobetuko luketenak ere. Horien beharrean gaude”.
Linea berri baten eskaera batzar nagusietan
EH Bilduk nabarmendu du pasa den ekainaren 6an Gipuzkoako Batzar Nagusiek onartu zutela Aldundiari eskatzea Goierri Eskuzaitzetako industrialdearekin, Errekalden Euskotrengo lineekin, Galarretarekin, Miramongo Parke Teknologikoarekin eta Donostiako ospitale-gunearekin lotuko dituen linea berri bat sortzea. “Uste dugu bigarren linea horrek nabarmen hobetu dezakeela Goierrin bizi direnen egunerokotasuna”.
Proposamen horrek “trafikoa eta horren ondorioak murriztea ere” bilatzen duela adierazi du. “EAEko mugikortasun azterlanaren arabera, Goierritik egunero Donostiara iristen diren autoen kopuruak hazkunde nabarmena izan du: 2016koak: 3.699. 2021ekoak: 5.631. Dena den, ez da zertan analisi zientifiko sakonik behar kotxe pribatuaren erabileraren hazkundea agerikoa dela adierazteko”.
“Uste dugu bi autobus linea horiek, Aldundiak landu duen GO07 eta proposatu duguna, osagarri izan daitezkeela eta osatu egin behar direla. Helmuga desberdinak dituzten bi zerbitzuekin, ziur Urola Garaiko eta Goierriko biztanleek irabaziko dutela”, zehaztu du.
Instituzioen arteko elkarlanik ez
Koalizioa Azahara Dominguez diputatuari zuzendu zaio. “Esan izan du alkateekin elkarlanean egin dituela proposamen hauek. Bada, EH Bilduren iritziz, ez da errespetu instituzionalez jardun. Izan ere, Zumarraga, Beasain eta Ordiziako alkateei bakarrik aurkeztu zitzaien pasa den urteko azaroaren 5ean proposamenaren zirriborroa. Zirriborro izaeraz gutxi zuena, proposamen itxi bat baitzen”.
