Jon Plazaolak Euskal Herria zinemaren ikuspegitik erakutsiko du ETB2ko 'Estamos Rodando' saio berrian
Datorren astelehenean, 22:20ean, Estamos rodando saioaren lehen atala emango dute ETB2n eta eitb.eus-en. Astelehen gauero, Jon Plazaola aktore urretxuarrak Euskal Herriko txokoak erakutsiko ditu zinemaren ikuspegitik. Film eta telesail ezagunen kokalekuetan barrena ibiliko da: Balenciaga, 20.000 especies de abejas eta Handia, besteak beste. Mundu osoan geroz eta indar handiagoa hartzen ari den movie tourism delako fenomenoari jarraituz, Euskal Herrian bisitatu ditzakegun lekuak hautatuko ditu Plazaolak, bertako parajeak, gastronomia eta kultura ezagutu asmoz. Bidaia horretan, Laudio, Gernika, Muskiz eta Antoñana bezalako herrietara joango da, eta gonbidatu bereziak izango ditu bidelagun: Borja Cobeaga, Kepa Sojo, Miren Gaztañaga, Lander Otaola, Mikel Losada, Jone Laspiur… Horrekin batera, euskal zinemagintzak bizi duen garai oparoaren erakusgarri izan nahi du saioak: ekoizpen kopuruak gorantz doaz, aktore harrobia ere geroz eta handiagoa da, eta egiten ari den lanari aitortza egiten zaio nazioarte mailan.
