Ostiral arratsaldean geltokietako jaiak hasiko dira. Aurtengo berrikuntza nagusia barrika lasterketa izango da. Igande arratsaldean egingo dute.
Barrika lasterketak duela urte batzuk egiteari utzi zioten asto lasterketa ordezkatuko du. «Garai batean asto lasterketa egiten genuen igande arratsaldean. Arrazoi ezberdinak medio, antolatzeari utzi genion. Hutsunea gelditu zen. Hutsune hori betetzea erabaki genuen eta Gasteizen arazo berbera izan zutela ikusi genuen. Han, Santiago eguneko asto lasterketa barrika lasterketarekin ordezkatu zuten. Ondo funtzionatu duenez, guk ere hori egitea erabaki dugu», azaldu dute Jai batzordeko kideek.
Binaka parte hartuko dute. Lasterketa 17:30ean hasiko da. Parte hartu nahi dutenek, 17:00etatik aurrera eman beharko dute izena, Berrikiko bidegurutzean. Lasterketa Domingo Mendiaraz plaza ondotik abiatuko da. Parte hartzaileak ikastolako bidegurutzeraino joango dira eta ondoren irteera punturaino itzuli. Erlojupekoa izango da. Joan-etorria azkarren egiten duen bikoteak 500 euro irabaziko ditu. Berrikira heltzeko denbora gutxien behar duen bikoteak, berriz, bi lagunentzako bazkaria irabaziko du. «Aldaparen bat jartzea pentsatu genuen, baina lehen urtean aldaparik gabe egingo dugu», aipatu dute.
Barrikak bi herrietako tabernetan eskatu dituzte. Proba egin dute, noski. «Gutako batzuk ikastolako patioan ibili ziren. Bikotea ez bada oso orekatua, indartsu bat ahulago batekin badoa, barrika joan egiten da. Arauei dagokienez, barrikei atzetik bultza egin behar zaie, biek batera bultzatu behar dute eta ezin da barrika gogor bultzatu eta bere atzetik korrikan joan. Barrika beti kontrolpean eraman behar da. Dena den, lasto fardo batzuk jarriko ditugu badaezpada ere. 18 urtetik gorakoek bakarrik eman dezakete izena. Ea jendea animatzen den!».
Barrika lasterketa ez da aurtengo jaietako berrikuntza bakarra. Bertso afariak erakargarritasuna galdu duela ikusita, aurten Ander Malbadi, Esti Curiel eta Mirari Martiarena bakarrizketariak gonbidatu dituzte.
