Ostiraletik igandera bitartean geltokietako auzoko jaiak ospatuko dira. Jaiak bihar (ostirala) hasiko dira, 17:30ean, ur pistola gudarekin. Pagoetako bidegurutzean egingo dute. Ondoren, txokolatada egingo dute Akelarre elkartearen kanpoaldean. Meriendatu ondoren, dultzainero, buruhandi eta erraldoiekin kalejira egingo dute. 18:30ean partxis txapelketa jokatuko da Txindokiko plazan eta 19:00etan triki-poteoa egingo dute.
21:30ean herri afaria egingo dute, bakarrizketariekin. Afaria Pagoeta gune soziokulturalaren ondoan muntatu den karpan izango da. Afalostean musika izango da nagusi: 23:00etan Oilar Beltzak taldeak joko du Txindokiko plazan, 01:00etatik aurrera Xaukena elektrotxarangak auzoko kaleak girotuko ditu eta 03:30etik aurrera DJ Chamarekin dantza egingo dute Txindokiko plazan.
Larunbaterako ere makina bat ekitaldi antolatu dute. 12:00etan toka txapelketa jokatuko dute Domingo Mendiaraz plazan. Ordu berean, zumba saioa eta haurrentzako jolasak izango dira Txindokiko plazan. 13:00etan Mobylette desfilea eta erakusketa egingo dituzte. 14:30ean paella dastaketa egingo dute Domingo Mendiaraz plazan. Gainera, Txiribiri elkarteko kideek beraien taila lanak erakutsiko dituzte Belaustegi plazan.
16:00etan mus txapelketa jokatuko dute ikastolan. Izen-ematea 15:00etatik 15:45era izango da. Bikote bakoitzak 40 euro ordaindu behar du. Zortzi hamarrekoko hiru partida jokatuko dituzte, zortzi erregerekin. Sariak mundialak izango dira: irabazleek 1.500 euro eramango dituzte, bigarrenek 600 euro, hirugarrenek 300 euro, laugarrenek 100 euro, bosgarrenek Kuko jatetxean bazkaria edo afaria, seigarrenek Korta jatetxean bazkaria edo afaria, zazpigarrenek Argindegi ostatuan bazkaria edo afaria eta zortzigarrenek ATA harategiak emandako saskia.
Txaranga
Mus txapelketaren ordu berean bingoan jokatuko dute Domingo Mendiarazen. 19:00etatik aurrera Trapalata txarangak auzoko kaleak girotuko ditu eta 22:45etik aurrera kontzertuak izango dira Txindokiko plazan. La Oreja de Van Gogh taldearen abestiak jotzen dituen Son de Rosas taldeak eta Zatekeen erromeria taldeak joko dute. Ondoren, DJ Murirekin dantza egingo dute.
Geltokietako jaiak igandean amaituko dira. 10:30ean txistulariek joko dute. 13:00etan patata tortilla lehiaketa egingo dute Txindokiko plazan. Sari banaketa 14:00etan izango da. 17:30ean barrika lasterketa egingo dute. Binaka parte hartu behar da. Izen-ematea 17:00etan izango da, Berrikiko bidegurutzean. 19:00etatik aurrera Bentazaharreko Mutiko Alaiak taldeak auzoa girotuko du.
Horretaz guztiaz gain, larunbatean eta igandean, egun osoan zehar, puzgarriak izango dira geltokietako plazan. Puzgarriez gozatzeko ezinbestekoa da galtzerdiak janztea.
