Jai Batzordeak prestatutako ia 300 lagunentzako paella erraldoia dastatu dute herritarrek eguerdian. Bihar amaituko dira jaiak.
Atzo hasi ziren Geltokietako jaiak, ur pistola gudarekin. Eguraldiak gaueko kontzertu bat zapuztu zuen arren, makina bat ekitaldi izan dute herritarrek gozatzeko, eta gaur eta bihar ere hala izango da. Gaur, eguerdian toka txapelketa jokatu dute Domingo Mendiaraz plazan, eta Mobylette desfilea ere egon da. Eguerdian, Jai Batzordeak prestatutako ia 300 lagunentzako paella erraldoia dastatzeko aukera izan dute gerturatu diren herritarrek, borondatearen truke. Arratsaldean mus txapelketa, txaranga eta kontzertuak daude.
Bihar bukatuko dira jaiak, baina arratsaldera arte beste hainbat ekitaldi izango dituzte auzotarrek. 10:30ean txistulariek joko dute, 13:00etan patata tortilla lehiaketa egingo dute Txindokiko plazan, eta 17:30ean barrika lasterketa egingo dute, aurtengo berritasuna. 19:00etatik aurrera Bentazaharreko Mutiko Alaiak taldeak auzoa girotuko du.
