Dendartean eta Bitartean elkarteek alegazioak aurkeztu dituzte Bengoleako HAPOaren aldaketaren aurka
Bi erakundeek salatu dute supermerkatu handi baten proiektuak kalte egingo diola tokiko merkataritzari eta ez datorrela bat interes orokorrarekin.
Bengoleako lur eremua. Dendartean Gipuzkoako Merkatarien Elkarteen Elkargoak eta Bi-Tartean elkarteak alegazioak aurkeztu dituzte Urretxuko Udalak 2025eko maiatzaren 28an hasiera batean onartu zuen Bengoleako 17.1 azpi-eremuari buruzko Hiri Antolamenduko Plan Orokorraren aldaketa puntualaren aurrean. Proiektuak supermerkatu handi bat ezartzeko aukera irekiko luke hiri-nukleo erresidentzialetik kanpo.
Bi erakundeek azaldu dutenez, aldaketak hainbat arrazoi direla medio sortu du haien aurkakotasuna. Nabarmendu dutenez, 2019ko ekainaren 27ko 10/2019 Legea urratzen du, lege horrek debekatzen duelako formatu handiko elikadura-supermerkatuak hiriguneetatik kanpo kokatzea. Horrez gain, “hiri-antolamendu neurrira” egindako kasu baten aurrean gaudela salatu dute, Bengoleako lurzati bati tratamendu berezi eta pribilegiatua emanez.
Bestalde, gogorarazi dute ez dagoela interes orokorrik edo justifikaziorik 2021ean onartutako HAPOaren irizpideak aldatzeko; plan horrek tokiko merkataritza indartzea eta adineko biztanleei gertuko zerbitzua eskaintzea zuen helburu nagusi. Aurkeztutako Ingurumen Ebaluazio Estrategikoa ere eskas geratzen dela kritikatu dute, ez baititu behar bezala aztertzen lurzoruaren kalitatea, zarata eta trafikoaren igoera bezalako alderdiak. Gainera, aldaketak plusbalio urbanistikoak ekarriko lituzke lurzatiaren jabeen alde, komunitatearen onurarako beharrezkoak diren konpentsaziorik gabe.
Tokiko merkataritzaren aldeko bi erakundeek desadostasuna adierazi dute Udalarekin, erabakia merkatarien iritzirik kontuan hartu gabe hartu delakoan. Haien ustez, supermerkatu handi batek tokiko saltokietan eta herri eredu osoan izango duen eragina oso handia izango da.
Amaitzeko, Dendartean eta Bi-Tartean elkarteek Udalari eskatu diote ez dezala aurrera egin HAPOaren aldaketa puntualaren onarpenarekin eta alegazio-prozesuan bi elkarteak interesdun gisa aintzat hartzea.
