Udalak eskaintzen ditu, eta unibertsitatez kanpoko prestakuntza ekintzen kostua osorik edo partzialki estaltzen dute. Lan egoera hobetu nahi dutenentzat ere badira. Urriaren 31ra arte eskatu daitezke.
Zumarragako Udalak formazio bekak eskaintzen ditu helduen enplegagarritasuna hobetzeko. Lan bila dabiltzan edo lan-egoera hobetu nahi duten 23 urtetik gorako herritarrei daude zuzenduta, eta unibertsitatez kanpoko prestakuntza ekintzen kostua osorik edo partzialki estaltzen dute. Urriaren 31ra arte dago irekia eskaera epea.
Laguntza hauek 2023-2027 Diru-laguntzen Plan Estrategikoaren parte dira, eta lanbide-gaikuntza handiagoa sustatzera bideratuta daude, lan-merkatuan sartzeko aukerak zabalduz.
Bekarako baldintzak
Zumarragan erroldatuta egon behar dute eskatzaileek, 23 urtez gorakoak izan behar dute, eta Lanbiden langabe gisa izena emanda egon behar dute. Enplegua hobetzeko egoera batean daudenei ere badaude zuzenduta bekak, hau da, adi baterako kontratuak edo lanaldi partzialak dituztenei, edo 1.200 euro baino gutxiagoko hileko soldata garbiak, aparteko ordainsarien hainbanaketa barne, jasotzen dituztenei. Gainera, gutxienez prestakuntzaren % 85 beteta izatea eta ikasgai guztiak gainditzea eskatzen da.
Diruz lagundu daitezkeen prestakuntza-ekintzen artean, lanbide-heziketa arautuko eta ez arautuko ikastaroak daude, betiere profesionaltasun-ziurtagiria lortzen badute. B motako gidabaimena ere sartzen da beketan. Ez dira kontuan hartuko hizkuntzetan oinarritutako prestakuntzak.
Gainera, ezohiko kasuak ere egon daitezke. Adibidez, 23 urtetik beherako pertsonek izango dute aukera, Lanbidek eta Udaleko Ekonomia Sustapen, Tokiko Garapen eta Berrikuntza sailak hala justifikatzen badute, eta Etxeko Arreta Soziosanitarioan profesionaltasun-ziurtagiriak lortzeko beharrezkoak diren prestakuntzak egiten ari direnak ere sartu ahal izango dira.
Eskaerak
Eskaerak Zumarragako Udalaren egoitza elektronikoan dagoen diru-laguntzen atarian formalizatu behar dira. Baliabide digitalik izan ezean, herritarren arretarako bulegoan jaso ahal izango dute laguntza herritarrek.
